唔知大家鍾唔鍾意食粥呢？定係唔好彩病咗先會去搵粥食呢？今次過咗大埔嘅傳統粥鋪兼黃店：廣記粥店 食粥，又平又好食，粥款夠多之餘，粥鋪其他必食嘅「配菜」油炸鬼、炸兩、炒麵、鹹肉粽，一樣都冇少！所以唔好諗住食粥一定唔飽！聽朋友講，呢度嘅星洲炒米都好出色㗎！大埔中心行過去都好近，踩單車想去食啲唔頂胃嘅嘢，過嚟食粥就一流啦！
大埔踩單車必食：大埔黃店：老虎岩潮式粉麵咖啡-手打燒賣配芝牛蛋治
廣記粥店招牌：菜乾排骨粥
好少見到出面嘅粥鋪會有菜乾排骨粥，通常都係艇仔粥、及第粥、牛肉粥呢啲，而呢個菜乾排骨粥味道唔錯，啲粥底都幾夠綿，唔似落咗粉去溝粥。菜乾味都幾香幾多，幾乎每一啖都有菜乾。見到鋪頭入面有海報話呢碗菜乾粥幾十年㗎喇！
足料艇仔粥
粥面見到好多蔥花真係正，粥入面嘅魷魚、花生、豬肉同其他料都幾多。慣咗食之前再落啲胡椒粉吊一吊味。
↓撳個廣告可以支持大兄台繼續寫作↓
未落醬嘅炸兩
炸兩份量都唔惹小，腸粉皮唔會好厚啱啱好，食之前記得落齊甜醬同麻醬！
叉燒腸粉
叉燒腸兩條加埋嘅叉燒唔多唔少，每啖都有叉燒食。
估唔到粥鋪都有得飲阿華田
由於Raven唔鍾意飲豆漿，估唔到竟然有得叫番杯細路哥口味嘅阿華田，正！
廣記粥店 餐牌
如果住附近嘅朋友嗰排食濟咗，落去食碗靚粥清清腸胃真係唔錯！就算住得遠嘅朋友，去開大埔都記得一定要去試試，叫碗粥份量唔算大，之後仲可以去其他黃店幫襯！