如果用一個人去描述Plan B cafe，就係一個外表係金頭髮白皮膚，但係可以講到流利廣東話嘅外國人，因為呢度係用咗好多唔同嘅港式飲食元素融入外國菜式入面。餐牌入面有啲食物名都好blow my mind，例如：麻婆豆腐意大利飯、蜜汁叉燒漢堡、魚香茄子意大利飯。叫得cafe當然仲有好多西式嘅食物啦，款式選擇都幾多，餐廳仲有兩層加上環境都幾好，過開去尖沙咀可以考慮下！
Plan B cafe: 蜜汁叉燒漢堡 $88
今次叫咗一份叉燒漢堡，叫味道都好驚喜，估唔到係咁夾。漢堡包好厚身，兩塊包都好軟熟，中間夾住好大塊蜜汁叉燒，肉質唔算好腍，但係味道的確唔錯。而叉燒上面仲有好多蔥同洋蔥，感覺有啲似食片皮鴨咁，但係夾叉燒原來都幾好，加埋一齊味道更加香濃。
Plan B cafe: 奄列配吐司 $88
除咗叉燒漢堡仲叫咗一份奄列，每份可以由(煙肉、芝士、火腿、蘑菇、蕃茄、茄汁豆、洋蔥粒)入面揀三款做配料。奄列都幾大份，味道可視乎大家揀咩配料，但係推介大家加洋蔥粒、芝士同蘑菇。
Plan B cafe: 雙重朱古力鬆餅 $25
最後我哋仲加咗一個鬆餅，朱古力份量好足，每啖都係超濃味朱古力。
↓撳個廣告可以支持大兄台繼續寫作↓
Plan B cafe: 鴛鴦 $46
值得一提係呢杯用咗意式咖啡配上港式奶茶沖調嘅「鴛鴦」，味道比起普通茶餐廳嘅鴛鴦味道完全唔同，冇咗港式咖啡嘅酸味，味道似係Cappuccino加咗茶味咁，值得一試。
Plan B cafe 餐牌
Plan B cafe 地址
尖沙咀其他好味推介
超正Burger: 嘉寶漢堡
打卡cafe: 鳥語
特色果醬cafe: Let’s Jam
