沙田黃店：蒸廬-好味點心唔一定要去茶樓食

沙田除咗有富東閣可以食到黃嘅點心之外，其實行遠少少去石門京瑞廣場(坐車方便啲)都有另一間黃店，細細間餐廳式經營嘅蒸廬。冇茶樓咁中咁多款點心，但係完全冇令人失望，點心即叫即蒸，夠晒熱辣辣，味道都夠水準！嚟到一定要試吓佢哋嘅招牌黑金流沙包，將奶黃包做到咁出色，由白色變做黑色，餡料仲要滿瀉出嚟，強烈推薦大家要試！餐廳人手唔多，落單需要大家scan番qr code，之後喺網頁上面落單，咁就唔會有茶樓漏單嘅問題！

蒸廬 – 必點流沙包同煎糯米雞蒸廬地址

檸檬地圖搵蒸廬

蒸廬 – 必點流沙包同煎糯米雞

唔知大家平時飲茶鍾意叫咩點心食，今次同女朋友兩個人叫咗4個點心，包括係：黑金流沙包、潮州大粉果、蟹籽燒賣皇同鳳凰煎糯米雞。印象最深刻一定係黑金流沙包，除咗外型上用咗黑色嘅包，包上面仲有金色嘅花紋，建議大家食嘅時候一定要拎定個碗放喺下面，因為一啖咬落去，入面嘅奶黃餡就會瀉出嚟，無負佢流沙之名呀！另外鳳凰煎糯米雞都係推介大家試吓，其他茶樓都好少可以試到煎糯米雞，雖然今次食嗰件糯米雞煎得唔夠乾身，但係下次去相信會有改善嘅。