武肺搞到香港人咁耐冇得去旅行真係好辛苦，成日都想食好味嘅台灣菜但又覺得味道爭啲？今次同大家介紹嘅尚青商號係喺香港暫時食過味道最好嘅台灣菜，無論係牛肉麵或者係拌麵，味道都好正宗，而且價錢一啲都唔貴，兩個人去食，人均都只係大概$100，加上餐廳環境幾整潔，所以十分推介大家拍拖或者同朋友聚會過嚟試下！
尚青商號: 埔里花雕半筋半肉牛肉麵 $80
今次叫咗呢一碗係花雕湯味嘅半筋半肉牛肉麵，湯底嘅花雕味相當濃郁，藥材味都幾香濃，大啖飲完個湯都唔會覺得過鹹/味精重。而牛筋同牛腩都炆到好腍，亦都好入味。而麵條可以揀幼麵/手工寬麵，我今次就揀咗手工寬麵，睇落係一條刀削麵，但係口感好滑，亦都唔會黐牙。另外，跟餐仲有3小碟伴菜，有油炸鬼、酸菜同埋是日小菜，當日去食就係木耳，味道都唔錯。
尚青商號: 台式蔥油拌麵 $54
女朋友就叫咗一碗蔥油拌麵，鍾意食拌麵嘅朋友一定要試下，麵上面有嘅蔥、XO醬、蔥油，撈埋一齊之後幼麵都可以好好咁吸到啲調味，食落相當惹味。而跟餐仲2款小菜，當日就係木耳同醃蘿蔔，味道少少酸刺激下食慾。
尚青商號: 椒鹽炸拼盤 $54
另外兩個人嚟食建議叫多一份拼盤，份量兩個人平分啱啱好，有蒜香雞翼、甜不辣、椒鹽四季豆、椒鹽百頁豆腐、台灣腸。整體味道幾香，唔會太鹹，夾埋蒜片食，特別香口，重口味嘅朋友冇可能唔叫埋。
↓撳個廣告可以支持大兄台繼續寫作↓
尚青商號: 餐牌款式夠多
尚青商號仲除咗牛肉麵同拌麵，仲有水餃、鴨血、魯肉飯同好多其他台灣必食嘅菜式，想食正宗台灣菜嘅朋友可以bookmark定下次約埋朋友一齊去試！
尚青商號 地址
如果想食其他台灣嘢可以睇埋：觀塘 龍鳳號