第4間同大家分享嘅長洲小店個名好長：慢活瞬間長洲粒粒雪糕，喺Google地圖入面嘅店鋪位置應該係錯嘅，下面會貼番個地圖畀大家。今次去見到成間餐廳得老細一個人負責晒所有嘢，嘢食都係即叫即煮，食物主要係唔同配搭嘅All Day Breakfast同三文治，而食飽最正係食埋粒粒雪糕！市區都好少地方食得到㗎喇！但係鋪頭細細，如果老細放假可能大家去到會摸門釘，所以可以留意下佢嘅Facebook。
長洲其他黃店推介：
↓撳個廣告可以支持大兄台繼續寫作↓
慢活瞬間長洲粒粒雪糕：配料足嘅全日早餐
今次叫咗兩份All Day Breakfast，一份係加拿大海洋帶子、另一份係特級法式香草羊架。兩份都有超香脆牛角包，另外仲有巴馬火腿、煙三文魚、大大條腸、煎蛋同沙律菜。整體味道都唔錯，但係羊架太細隻，多一隻就好喇…個煎蛋都有燶邊好脆都好正！
而跟餐仲有熱辣辣嘅湯，同埋嘢飲。
係粒粒雪糕呀！係粒粒雪糕呀！係粒粒雪糕呀！
唔知睇緊呢篇文嘅你有冇食過粒粒雪糕呢…而家好少地方有得食，估唔到去到長洲竟然有得食！呢度都有幾多口味揀，今次叫咗一款係雪葩-冰極彩虹，同另一款雪糕-黑白朱古力。真係好懷念嘅口感！
↓撳個廣告可以支持大兄台繼續寫作↓
慢活瞬間長洲粒粒雪糕 地址
餐廳入面睇得出老細應該係幾鍾意音樂嘅人，掛喺牆好多都係80-90年代好經典嘅歌手/樂隊。
如果大家下次去長洲記得要去支持小店！餐廳地址係長洲新興海傍街11號地下，可以用下面地圖做參考！
