高雄台南自由行5日4夜行程分享(2019) Day 1

day1 1

台南原來地理位置喺高雄嘅北邊!?由香港飛往高雄嘅時間一個小時就搞掂,啱晒啲鍾意快閃嘅朋友~ Raven就選擇 今次 5日4夜先去台南後去高雄,而家簡單介紹番喺台南第一日嘅行程:(其餘日子行程請到 ?這裡)

↓撳個廣告可以支持大兄台繼續寫作↓

香港國際機場 –> 高雄小港機場 –> 捷運高雄車站 –> 高雄火車站 –> 台南火車站 –> 民宿樹夏 –> 午餐:府城一味品碗棵 + 水仙宮(國華街) –> 下午茶冰鄉 –> 台南美術館二館 –> 林百貨 –> 藍晒圖文創園區 –> 晚餐:彊彊串燒(保安路) + 188宵夜早點–> 民宿:樹夏

高雄台南自由行5日4夜 Day 1嘅行程 請到 ?這裡
高雄台南自由行5日4夜 Day 2嘅行程 請到 ?這裡
高雄台南自由行5日4夜 Day 3嘅行程 請到 ?這裡
高雄台南自由行5日4夜 Day 4嘅行程 請到 ?這裡
高雄台南自由行5日4夜 Day 5嘅行程 請到 ?這裡

去台南一定要嚟住嘅民宿 ? 樹夏

第一次嚟到台南嘅大家一定會對台南嘅交通相當好奇,洗唔洗包車呀?冇地鐵點算?其實台南最主要公共交通工具相信係公交,即係巴士。而今次同大家介紹嘅民宿「樹夏」就正正係交通位置唔錯嘅神農街旁。只要大家喺台南火車站出閘,過對面巴士站坐車都係30分鐘就到達民宿。民宿主人好友善,入住時候會主動分享附近有咩好食好行,有咩問題都可以問佢。而樹夏嘅房間分佈係一層一間,如果你入住較高層數,又拖住好重嘅行李可能就會有少少辛苦喇!今次同屋企入住2個房間,裝修都好新淨,而且房間好大,所以一定唔會話打開行李之後轉身都難。房內有wifi、好夠涼嘅冷氣、電視同雪櫃等設備,都好夠旅行用。雖然附近就係神農街,不過唔洗怕嘈,因為台南真係一個好靜好舒服嘅城市。附近都好多好嘢食,又近國華街,又近公交站,做咩都好方便。

代表台南飲食文化嘅街?國華街

日本旅遊雜誌 《BRUTUS》將國華街作為介紹台南嘅封面,而呢度究竟有咩吸引呢?國華街呢度有好多傳統老店,好多台南嘅傳統美食:碗粿意麵呢啲好容易就搵得到。呢條街有種香港街市嘅感覺,地下可能濕淋淋,人又多又密企滿條街,但係會畀到人一種親切嘅感覺。而國華街附近亦都真係有個台南人都嚟嘅市場,即係香港嘅街市。如果大家喺早上諗唔到食咩,不妨行過嚟望吓有冇嘢啱自己。

夏日消暑唔食唔得嘅甜品?冰鄉

香港夏天已經夠熱,而台南比香港更加熱,所以旅行嘅時候真係有啲辛苦。所以,今次介紹一間就算冇冷氣都一定令你透心涼嘅小店:冰鄉。由於台南嘅府城區唔怕辛苦其實行路就可以去晒大部份想去嘅地方,所以大家儘管打開Google地圖跟住行就OK喇!呢間食冰嘅小店,每碗冰都唔係普通香港見到嘅大細,Raven一行五人食一個就夠,不過眼見其他人一人一碗咁食,都算大開眼界~而且,好多台灣人著住番工衫出嚟食,相信都係地道小店之一。咁 冰鄉 賣嘅冰其實都好睇你幾點去,因為有啲大熱嘅味道可能一早賣晒,要知最近賣緊咩口味,建議大家去IG搵吓就知。我哋點嘅係紅豆布丁口味,可能比較普通,不過其實佢有超充足嘅紅豆,加埋都有啲糖漿同布丁咁,所以味道都唔錯,加埋咁熱嘅天氣,真係好難抗拒呢碗冰。

台南打卡熱點? 台南美術館二館

食完冰係時候去影相打卡喇,台南美術館二館係近年台南最熱門嘅景點之一,因為佢嘅建築造型好適合各位影相,加上 美術館 外嘅樓梯、平台嘅開放時間夠長,就算閂館未能入內,大家都可以盡情喺外面影相。而Raven去嘅時候正值日落時分,喺呢度較高嘅位置睇日落,感覺特別平靜,十分舒服。

行得買得睇得嘅歷史建築?林百貨

去完 台南美術館二館 之後,行過去林百貨十分容易,唔洗十分鐘就可以到達。林百貨係南台灣首個百貨公司,亦有第一部電梯,天台更加有鳥居同神舍,相當有特色!建築物只有幾層,但係裡邊有售賣唔同商品,亦有餐廳、歷史展品區,所以大家可以預多少少時間去認識呢一座林百貨。

去又得唔去都得?藍晒圖文創園區

藍晒圖文創園區座落喺新光三越旁邊,好容易搵到。Raven夜晚嚟到呢個文創園區,第一個感覺係好細,不過都有幾個小店可以畀大家行下,都值得去探店嘅。但係如果大家計劃嘅行程唔算近,可以直接將呢個地點剔除都唔會可惜嘅。

台南食晚餐值得一去?保安路

首先提提大家,Raven覺得台南嘅生活比起台北同高雄更慢,店鋪亦都會比較早閂,所以一定要預早少少去食飯或者係shopping。介紹大家嚟保安路搵食嘅原因係呢度食店比較多,如果想食傳統台南食品,好似牛肉湯、虱目魚都搵得到,而且呢度見得到嘅食店,望落都好有老店嘅外表。最後我地先去咗一間疆疆串燒先飲番支凍啤,不過因為時間唔算早,好多餐廳都已經閂門。最後,我哋因為未食飽所以仲行咗去一間開到比較夜嘅小店188宵夜早點填飽埋個肚先番去民宿。

↓撳個廣告可以支持大兄台繼續寫作↓