高雄台南自由行5日4夜行程分享(2019) Day 2

day2

台南嘅早上並冇城市嘈雜嘅聲音,反而令人有一種好輕鬆自在嘅感覺。喺台南嘅第二日,Raven計劃主要係去安平區同漁光島。行程如下:

↓撳個廣告可以支持大兄台繼續寫作↓

民宿:樹夏 –> 義豐冬瓜茶 –> 早餐:雙生Cafe –> 赤嵌樓 –> 安平老街 –> 周氏蝦捲 –> 漁光島 –> 憶載金城 –> 香茅魚泰色料理 –> 泰成水果店 –> 神農街 –> 民宿:樹夏

高雄台南自由行5日4夜 Day 1嘅行程 請到 ?這裡
高雄台南自由行5日4夜 Day 2嘅行程 請到 ?這裡
高雄台南自由行5日4夜 Day 3嘅行程 請到 ?這裡
高雄台南自由行5日4夜 Day 4嘅行程 請到 ?這裡
高雄台南自由行5日4夜 Day 5嘅行程 請到 ?這裡

朝早就應該飲杯地道嘅 ?義豐冬瓜茶

其實就喺行去食早餐嘅途中會遇到呢間老字號,不過其實成個自由行期間,都只係飲過一杯冬瓜茶。呢杯冬瓜茶同其他地方飲嘅味道一樣都係清甜,唔同嘅係呢度可以揀客人選擇甜度,好似大熱嘅手搖形珠奶茶咁,比起街上已經調好大大桶嘅冬瓜茶相比,應該算係新鮮啲!?

年輕人主理環境舒適嘅 ? 雙生Cafe

民宿主人有提過喺台南旅遊,記得見到小巷都要入去望望,因為喺呢啲橫街窄巷可能發現到驚喜,的確好多小巷入面真係收埋好多好店,例如今次想分享嘅雙生cafe
呢間小店賣嘅食物唔多選擇,但係一定會食得好滿足,加上店內座位唔多,所以可以好好享受呢個寧靜嘅早餐。店入面員工唔多,而炮製好味嘅鬆餅都需要時間,所以大家可以喺等待食物嘅時候望吓店入面唔同嘅擺設。

發現台南歷史一面 ? 安平老街/安平古堡…

安平區這個旅遊區其實都唔細,但係交通方法只有一種:就係步行!因為景點分散,而且可能沿路會搵到你鍾意嘅景物。不過Raven只係行咗安平大街同安平古堡,之後就離開。安平古堡有觀景台畀大家眺望成個安平區,值得一上。而堡內可以買到想成功一定要買嘅鄭成功薯片/啤酒!而安平街上可以買到唔同嘅手信同小食,不過比起夜市見到嘅更加有特色。

安平區手信可以望吓 ? 周氏蝦捲 / 林永泰興蜜餞行

喺安平區遊走唔難見到各式小食,而如果你鍾意蜜餞的話,喺安平老街入面有一間百年老店,佢賣數十種不同口味、不同食材造嘅蜜餞,Raven仲記得有辣味蕃茄,大家買台南手信都可以特別啲!之後因為要去漁光島,所以就去另一間老店: 周氏蝦捲 食個late lunch。除咗食到蝦捲,大家可以參考吓個餐牌,其實都有其他食物提供。不過,大部份嘅食物味道都唔係好突出,所以大家可以買走拎住食,搵另一間食店坐低食咁。

帶著風沙嘅漁光島藝術節(已完) ? 漁光島

漁光島藝術節今年係第3年舉辦,島上擺放咗多個裝置藝術品,不過大家睇緊文章嘅時候, 漁光島藝術節2019已經完結,大家可能要等下一屆先得喇!但係今次去漁光島都一定要同大家分享一下,由於安平區同漁光島距離有點遠,所以如果大家人數可以湊到一架的士,建議大家嘗試坐的士去。又或者可以嘗試用台南嘅城市單車代步更加可以欣賞到當地景色。而99號公交車除咗到達安平老街,其實仲可以去到七股,當地近年有一個熱門打卡地點叫七股鹽山,大家今次錯過藝術節,不妨繼續坐公交去七股遊覽。咁平日值唔值得去漁光島?佢有一個大沙灘,可能伴隨住超大風沙,如果你喺香港都唔會行海邊,呢度相信都唔會係你考慮嚟嘅地方。

晚餐隨便入一間竟然係 ? 香茅魚泰色料理

去台灣旅行竟然要食泰國嘢做晚餐?有冇搞錯呀?其實都係咁啱同咁橋囉~咁台灣對泰國菜嘅名同香港只係有些少唔同,睇唔明就睇圖囉,另外呢間餐廳可以自選辣度,對食辣冇信心嘅人係可以走辣嘅。不過以食物嚟計,味道都OK!不過一定唔係大家去台灣旅行最理想嘅晚餐。不過,位處國華街三段附近有街道美術館,好啱大家打卡影相。喺附近嘅街道好易搵到唔同嘅裝置藝術,好多都好靚好有意思。

台南超好味水果雪糕甜品 ? 泰成水果店

無論飯前果定係飯後果,好味嘅就一定係好水果!仲要配上冰凍雪糕,食飽飯再嚟都唔會過份!喺台南要搵到想去嘅餐廳,其實真係唔難,因為打開Google Map之後跟住行一定會錯,大部份網上有人介紹過嘅餐廳/小店都一定搵得到,Google喺台灣好用度,係香港完全比唔到嘅。泰成水果店除咗可以買到水果,最正梗係水果冰啦!相信每日有唔同口味,但係大家可以望吓個餐牌了解吓,最上面係唔同口味嘅冰凍水果,下面係哈蜜瓜果肉加唔同口味嘅沙冰,當日Raven就揀咗4個其中2個口味,水果香甜冰凍好舒服,好消暑~ 強烈推薦各位去台南一定要去食!

台南每日鮮製好味雪糕 ? 蜷尾家甘味處散步甜食

台南食凍嘢原來又好味!食過冰,食過水果,今次食真正嘅軟雪糕!蜷尾家就喺正泰成水果店對面,所以一場嚟到就要食晒兩間啦!店鋪全名係「蜷尾家甘味處散步甜食」,平時都會有期間限定口味雪糕,而且唔係普通啲水果味、朱古力味咁,Raven當日食嘅係麵茶味,另一口味係鐵觀音味!上網睇番佢之前有同其他品牌推出過:布丁霜淇淋X阿薩姆紅茶雞蛋糕、冬瓜檸檬茶、斯里蘭卡紅茶、抹茶等等!所以每次去都有機會食到新口味,提醒大家一下,所有雪糕都係限量發售,想食到心儀口味,記得早啲到呀! 蜷尾家 係排隊店,大家知點做啦~

日間小清新晚間浪漫迷人 ? 神農街

今次去台南覺得自己揀住宿揀得好啱,交通算係唔錯,住嘅環境好好,隔離係台南其中一條好有特色嘅街道:神農街。神農街曾經係清代一條繁華嘅街道,而街道嘅建築物到現在都有保留到,所以日間可以抬頭望望,或者行吓附近一啲古廟咁,會發現呢度好純樸,顏色好簡單,係一個影相打卡嘅好地方。而街尾有一間cafe可以畀大家行到攰稍作休息。當天色漸暗,神農街亮起各式樣嘅燈光,好難想像呢度係同一條街道。晚間行嚟會見到好多文青小店打開門,Raven覺得每一間都人值得入去,無論有冇嘢啱買,都可以睇吓台南人嘅作品。

高雄台南自由行5日4夜 Day 1嘅行程 請到 ?這裡

↓撳個廣告可以支持大兄台繼續寫作↓