高雄台南自由行5日4夜行程分享(2019) Day 4

day4 1

高雄一日遊可以有好多唔同嘅選擇,而Raven就揀咗「旗津+駁二」。旗津近年新開咗嘅幾個新景點:彩虹教堂、海珍珠;駁二藝術特區同棧二庫等,都好足夠畀大家消磨一日嘅時間,即刻睇吓高雄台南自由行5日4夜第4日嘅行程:

↓撳個廣告可以支持大兄台繼續寫作↓

民宿:時.間. –> 早餐:喵姨蛋餅 –> 雙妃奶茶 –> 麻薯 –> 鼓山碼頭 –> 旗津碼頭 –> 旗津 (彩虹教堂 + 大響螺 + 星星棧道) –> 旗津碼頭 –> 棧二庫 –> 駁二 –> 永心鳳茶 –> 六合夜市 –> 新堀江商圈 –> 民宿:時.間.

高雄台南自由行5日4夜 Day 1嘅行程 請到 ?這裡
高雄台南自由行5日4夜 Day 2嘅行程 請到 ?這裡
高雄台南自由行5日4夜 Day 3嘅行程 請到 ?這裡
高雄台南自由行5日4夜 Day 4嘅行程 請到 ?這裡
高雄台南自由行5日4夜 Day 5嘅行程 請到 ?這裡

高雄早餐店賣甜鹹特色味道蛋餅吐司 ? 喵姨蛋餅

鹽埕埔捷運站附近除咗有駁二,仲有呢間超值得推介嘅早餐店「喵姨蛋餅」!佢嘅蛋佔同吐司味道相當特別,除咗普遍食到嘅鹹蛋餅,佢竟然有甜蛋餅!朱古力味、花生味、肉桂味等等,可惜周末係唔提供㗎!大家想試齊甜鹹味,就要平日去試喇!講番今次Raven試到嘅泡菜燒肉蛋餅、煉乳肉鬆吐司/蛋餅,味道都好有水準, 煉乳肉鬆呢個味好特別,既甜又鹹咁~而 泡菜燒肉蛋餅 超足料,味道都好好,食完好滿足!

高雄鹽埕區必飲奶茶檔 ? 雙妃奶茶

P 20190414 114232

高雄鹽埕區新樂街有好多唔同大大小小嘅奶茶/珍奶店,其中一間比較受歡迎就係「雙妃奶茶」。都係喺鹽埕埔捷運站幾分鐘路程就可以嚟到嘅奶茶店,奶茶產品名好有趣:雙妃奶茶、美人奶茶、長壽奶茶、長春奶茶等。主要分別係紅茶、鮮奶、普洱茶、嘅比例,當中亦都影響咗甜度。另外,鍾意珍珠嘅要留意喇,呢度免費可以加珍珠嘅!而高雄嘅鹽埕區新樂街其實仲有好多唔同嘅奶茶店值得大家去試吓:樺達奶茶、研茗奶茶等。

高雄手信買咩好?一於揀 ?阿綿麻糬

很可惜Raven今次無緣試到台灣網民推介嘅手信店「阿綿麻糬」,因為當日去到該店已經接咗好多order,要先預訂再喺當日稍後時間先可以拎到,不過行程問題唔容許,所以唯有放棄…

不過都可以同大家介紹吓呢間「阿綿麻糬」,佢賣嘅麻糬全部人手即點即做,口味眾多,有傳統芝麻、紅豆等等口味,亦有啲時令水果味。小店位置鹽埕埔,就喺人氣老店「孫家肉粽」附近,唔難搵到。

高雄必到人氣打卡景點 ? 旗津

高雄其實有幾條碼頭航線畀遊客往返旗津同高雄市,而Raven推介大家可以先由「鼓山輪渡站」(捷運西子灣站) 出發到旗津,再由「旗津輪渡站」出發到「棧貳庫」(高雄新濱碼頭)。

旗津島上嘅交通好唔方便,雖然有紅色9號公交車,但係路線可能唔會好配合今次要介紹嘅行程。所以Raven今次推介大家選擇步行/租電動四輪單車/機車等方法遊歷旗津島。大家需要留意嘅係1. 步行雖然好似有點辛苦,但係就可以慢慢欣賞整個路線沿途風景。 2. 租任何電動車都需要留意人數上限、駕駛安全,唔好為咗趕行程就開快車,小心為上。

「旗津彩虹教堂」同「旗津海珍珠」距離好近,所以大家要去齊兩個景點打卡先得。不過 彩虹教堂 可能容易令人失望,因為位置有點尷尬,佢係建喺遊客中心隔離,景觀大打折扣。反而 海珍珠 地點十分開揚,而且喺沙灘旁吹住海風好舒服。

旗津島仲有其他景點:「旗後砲台」、「高雄燈塔」、「旗津老街」、「旗津星空隧道」等等,大家都可以花時間去行吓!

旗津碼頭往棧貳庫 旗津往駁二交通推介

首先提提大家往返旗津同棧貳庫嘅航班只係周末行駛!大家只要到旗津碼頭會看到2號候船室/標示住 棧貳庫 嗰邊就啱喇!當日船上而有伯伯吹口琴表演,見佢每程船都好盡力表演,吹奏住唔同熟悉嘅音樂,真係第一次覺得船上面聽音樂係幾享受~ 落船後碼頭對住嘅就係 棧貳庫 !

棧貳庫同駁二真係 好買好行好打卡

棧貳庫係駁二藝術特區入面一座室內購物中心,仲有餐廳同小食店。而駁二藝術特區範圍都幾大,每條路都有唔止一個打卡位,大家要好好留意四周圍嘅特色!

高雄好味異國料理餐廳分享 ? 天使餐坊

去到台灣可能大家會諗到去夜市食嘢,或者去各式各樣嘅火鍋店,但係Raven覺我小餐廳都好值得大家去試,無論去台北、台中定高雄,好多唔同餐廳都好有特色。今次介紹嘅「天使餐坊」係由一對情侶所開,其中女生仲係嚟自越南,所以喺餐牌會搵到唔同嘅「外婆味道」菜式。餐廳環境好舒服,加上食物準備時間都好快,大家可以好快試到唔同菜式,味道都好唔錯,好易接受!而飲品有唔同嘅特調,都值我大家叫嚟試吓!

最後希望呢個「 高雄一日遊 」嘅行程幫到大家計劃旗津嘅行程,當中嘅餐廳食物都係十分推介大家去嘗試,而景點當然大家可以微調,去一個屬於自己嘅旅程啦!

↓撳個廣告可以支持大兄台繼續寫作↓