黃店髮泥開箱:K髮泥Plus & Firsthand 髮泥 @張梁記

黃店髮泥開箱 @張梁記

唔知各位男士平時係去邊度買髮泥呢?今次同大家分享一間賣好多男士用品嘅黃店:張梁記,佢哋唔淨止賣髮型用品,仲有賣剃鬚用品、頭髮護理等等嘅產品,有實體店仲有Online shop,方便各位大忙人冇時間親自去鋪頭選購就可以網上落單。另外文章入面仲會分享我早排喺張梁記買嘅兩盒髮泥嘅使用體驗:K髮泥Plus 同 Firsthand Supply 混合髮泥髮油。

↓撳個廣告可以支持大兄台繼續寫作↓

張梁記Online Shop連結

買髮型用品都要去黃店:張梁記

張梁記 黃店髮泥
髮泥開箱:K髮泥Plus & Firsthand 髮泥

黃嘅salon其實都唔少,但係如果要搵黃店賣gel頭用嘅髮泥,噴髮膠呢啲可能真係唔易搵。張梁記賣唔少嘅髮型用品,由gel頭用、洗頭用、到保護頭皮用嘅護髮用品都有。

Firsthand Supply 混合髮泥髮油試用

張梁記 黃店髮泥: Firsthand Supply 混合髮泥髮油 $165
Firsthand Supply 混合髮泥髮油 $165

首先利申我係短髮嘅。而呢罐係今次買嘅其中一款髮泥,個人感覺係開蓋後聞落氣味幾清新,髮泥質地唔硬,手指比較容易就可以拎到適量髮泥。放到手之後髮泥好易就推得開,gel上頭可能因為髮泥質地本身都算軟,所以都好輕鬆可以gel到需要嘅髮型。而頭髮喺gel頭後會有少少光澤,就算唔噴膠都keep到個型全日。
洗手嘅時候發現要用比較多時間捽乾淨,但留意並唔係因為髮泥乾而難洗,反而係佢好似陶泥咁痴手,所以要花精神洗手。
洗頭嘅時候並唔會難沖洗,用花曬沖洗一陣,髮泥好明顯就已經少咗,頭髮都開始鬆番,之後用番洗頭水適當咁洗就ok。

產品資訊/購買連結:Link

K髮泥Plus試用

張梁記 黃店髮泥: K髮泥Plus $189
K髮泥Plus $189

而呢一款髮泥比起上面嗰款就有幾個唔同。首先係髮泥香味都唔錯,係有一種檀香味,質地比起另一款明顯硬,取用髮泥嘅時候需要比較用力,可能仲要1-2次先拎夠髮泥。喺雙手推開髮泥嘅時候,亦都感受到佢較乾,比較難推開。gel頭時都因為比較難推,有時會kick頭髮。gel完頭之後,頭髮比較啞身,髮型亦都可以唔噴膠keep到全日。

如果大家鍾意啞身嘅造型可以試吓K髮泥Plus,如果唔係,可以考慮Firsthand Supply 混合髮泥髮油。當然,髮型用品最好試過先買啦,咁大家就可以去鋪頭試下啱唔啱自己需要。

產品資訊/購買連結:Link

同場加映:剃鬚用品應有盡有

image 2
張梁記剃鬚用品

大家用剃鬚刀定係電鬚刨嚟解決剃鬚問題呢?Raven自己本身一直都用緊隨手都買到嘅4刀片剃鬚刀,喺上年Black Friday就貪得意買咗部百靈牌電鬚刨。剃鬚前用剃鬚膏軟化啲鬚,之後先可以令到剃鬚過程舒服又貼服。剃完之後又要搽番少少潤膚保濕抗敏嘅cream先可以少啲敏感乾燥,張梁記除咗有各類型剃鬚膏,仲有鬚後水/cream,最正係有唔同嘅剃鬚刀,當中有啲係香港比較少見嘅單刀片傳統剃鬚刀。

希望今次嘅分享啱大家啦!

↓撳個廣告可以支持大兄台繼續寫作↓