沙田黃店：越南仔-平食法國越南菜-原來越南都興蕃茄湯
喺香港想食東南亞國家嘅菜式唔難，好易就搵到日本菜、韓國菜、泰國菜呢啲餐廳，但係食越南菜又好似真係比較少，今次同大家介紹沙田圍嘅黃店：越南仔，正正係主打越南正宗嘅菜式，睇完一次menu你就會發現平時去食小巴黎原來冇咩真正越南菜式。餐廳老細冇去越南學過廚，大部份嘅食物都係以前留學嘅時候，一班越南同學媽咪教佢煮，點解我知？因為鋪頭部電視機loop住條片，你去一次你都會知。食物方面，今次試咗越式嘅蕃茄湯粉同撈檬，味道唔錯，值得下次再去試埋其他嘢！ 搵黃店記得用：檸檬地圖 Lemon Map 食馬拉菜可以睇埋：Mimila-新城市內馬拉菜黃店-有好味喇沙蝦子麵 越南原來都有蕃茄湯 可能都係自己孤陋寡聞，今次去越南仔見到有蕃茄湯所以特登叫咗一碗嚟試，味道同其他地方嘅蕃茄湯好唔同，有種香料嘅香味，加埋好多洋蔥紅洋蔥同炸蒜，令到個湯都幾香幾濃，啲湯汁都會痴住啲麵，唔經唔覺好易食完碗粉，碗湯都冇咗一半。 檬粉彈牙啲肉都好好味 呢碗撈檬個烤肉真係好正，啲人夠軟身唔痴牙，加埋味道都好濃，同啲配菜放埋一齊撈，口感都唔錯。魚露唔會話好鹹好酸，令到啲檬粉唔會得啲魚露味。 飲品都好多嘢揀 今次叫咗紅豆冰同三檸七，平時大家飲龍鳳檸樂可能飲得多，但係黃檸+青檸再+咸檸可能真係少啲，下次可以去試吓！雖然青檸+黃檸嘅味道唔算好突出，容易比咸檸遮住。呢度仲有好多唔同嘅特飲，淨係要試齊想飲嘅都要嚟幾次先得… Menu…
沙田黃店：SUPINE-特色漢堡好味CP值超高！
沙田經瑞廣場雖然距離新城市真係有段距離，但係如果你想食好味嘅漢堡包，又想支持下黃店就一定要嚟試下SUPINE！佢哋主要都係賣意粉、意大利飯同埋漢堡包，而當中最吸引嘅當然係幾款出面應該食唔到嘅特色漢堡，漢堡包好厚好大份，主菜同啲配料都超足料，味道都唔錯，最重要係幾十蚊已經跟埋薯條同飲品，價錢真係算抵食！與其去啲外國連鎖店排咁長隊等食，不如去幫襯多啲黃店啦！ 京瑞廣場其他黃店：沙田黃店：蒸廬-好味點心唔一定要去茶樓食 搵黃店記得上 LemonMap.io 檸檬地圖 正呀喂！SUPINE 日本咖哩滑蛋吉列豬扒漢堡 SUPINE嘅漢堡包Menu真係唔簡單，淨係漢堡包都有6款，有素嘅、有雞嘅、有牛嘅、有豬嘅，仲有魚嘅，總有一款啱你口味啩！詳細Menu可以睇番最下面嘅Menu相。今次食嘅係日本咖哩滑蛋吉列豬扒漢堡！唔係飯呀，係漢堡！睇圖應該都睇得出好厚好大份啦，所以想拎上手咁咬都唔易，可以搵張紙巾包住食又得，拎起刀叉切開一嚿嚿咁食都得，想點食就點食唔洗理人哋點睇嘅。味道方面，因為有滑蛋同咖哩豬扒，味道其實真係好香好好味，加埋其他配菜，好Fresh好正。跟餐可以揀要薯條或者湯，我就當然揀薯條啦！又粗又脆，比起出面好多薯條都好食！ SUPINE 珍珠帶子法式芥末忌廉汁意大利飯 都唔錯 呢個珍珠帶子法式芥末忌廉汁意大利飯唔算好傳統正宗嘅意大利飯，不過整體味道都OK嘅，個法式芥末唔算話好酸或者攻鼻，所以都可以接受。…
沙田黃店：蒸廬-好味點心唔一定要去茶樓食
沙田除咗有富東閣可以食到黃嘅點心之外，其實行遠少少去石門京瑞廣場(坐車方便啲)都有另一間黃店，細細間餐廳式經營嘅蒸廬。冇茶樓咁中咁多款點心，但係完全冇令人失望，點心即叫即蒸，夠晒熱辣辣，味道都夠水準！嚟到一定要試吓佢哋嘅招牌黑金流沙包，將奶黃包做到咁出色，由白色變做黑色，餡料仲要滿瀉出嚟，強烈推薦大家要試！餐廳人手唔多，落單需要大家scan番qr code，之後喺網頁上面落單，咁就唔會有茶樓漏單嘅問題！ 檸檬地圖搵蒸廬 蒸廬 - 必點流沙包同煎糯米雞 唔知大家平時飲茶鍾意叫咩點心食，今次同女朋友兩個人叫咗4個點心，包括係：黑金流沙包、潮州大粉果、蟹籽燒賣皇同鳳凰煎糯米雞。印象最深刻一定係黑金流沙包，除咗外型上用咗黑色嘅包，包上面仲有金色嘅花紋，建議大家食嘅時候一定要拎定個碗放喺下面，因為一啖咬落去，入面嘅奶黃餡就會瀉出嚟，無負佢流沙之名呀！另外鳳凰煎糯米雞都係推介大家試吓，其他茶樓都好少可以試到煎糯米雞，雖然今次食嗰件糯米雞煎得唔夠乾身，但係下次去相信會有改善嘅。 蒸廬 地址
沙田黃店：榮樂茶餐廳-香港嘅古早味舊港式茶記
相信茶記係香港人最常食嘅餐廳，但係近年茶記都要美化到唔似係一間茶記，而喺沙田瀝源邨超黃茶樓隔離其實仲有一間舊式嘅屋邨茶記：榮樂茶餐廳，裝修好似停留咗喺90年代電影畫面咁，餐廳門口亦都坐咗唔少食客，食客同餐廳店員有傾有講，常餐嗰頭寫完，轉頭就做好送到嚟，茶記賣嘅正正就係呢種速度同情懷。可惜而家有啲人追求茶記要有西餐廳嘅裝修同擺設，無奈... 最愛嘅常餐個公仔麵係福麵，唔洗加錢㗎，跟餐個包仲可以加錢轉做菠羅包/多士。 榮樂茶餐廳：傳統港式味道 初頭以為常餐個公仔麵會係啲大光麵，問店員有冇得轉做出前一丁竟然冇，原來佢哋係用福麵嘅。沙嗲牛肉都幾香濃，食得出係自己調味，唔係罐頭嘢。餐包本身想轉做菠羅包，可惜賣晒，唯有轉烘底多士啦。火腿奄列個蛋炒得唔錯，略嫌入面啲火腿唔夠多。最後睇埋個裝修，雖然係舊，但係完全唔會覺得污糟！ 榮樂茶餐廳 - 地址
沙田黃店：Mimila-新城市內馬拉菜黃店-有好味喇沙蝦子麵
沙田區嘅黃店其實真係唔少，不過就係分佈得比較遠，如果想食黃嘅馬來西亞菜，新城市廣場入面7樓就正正有一間Mimila。其實諗番香港鍾意食喇沙嘅人應該都唔少，但係要有一間水準唔錯嘅就有啲難度，今次食過Mimila之後先發覺唔同地方做嘅喇沙真係唔同口味，連蝦子麵都完全Blow My Mind，你哋唔好再買垃圾壽X牌啲麵喇，食蠢人㗎！要食就入沙田食啦！ Mimila - 好味喇沙好味蝦子麵 (其實今年本身Plan咗去馬來西亞但多謝中共呢個幻想幻滅咗)上年去新加圾食過喇沙，味道就比較重椰奶味。今次喺Mimila食，就會覺得蝦味濃郁好多，而摻摻亦都係油麵同米粉，麵質都彈牙，最正都係豆卜吸晒啲湯汁咁食。而個蝦子撈麵望落以為佢好乾，但係每條麵都好似用湯汁做咁，勁Juicy勁香，完全對蝦子麵改觀。 Mimila 地址
