《濁水漂流》電影分享-露宿者需要嘅係公平唔係同情

《濁水漂流》電影分享-露宿者需要嘅係公平唔係同情
《濁水漂流》電影分享-露宿者需要嘅係公平唔係同情

濁水漂流唔係一套睇完會令你喊得聲嘶力竭嘅慘戲,但係會令到你走出戲院嗰陣有種啞口無言嘅鬱結。電影入面講嘅係香港入面一班可能冇咩人會留意,甚至得唔到尊重嘅一群露宿者。由唔知幾時開始,球場多咗個鐵閘,天橋底嘅磚鋪到高高低低,公園嘅長櫈座位分到一格格咁,夜晚失機無神會洗地。電影入面冇解釋到佢哋點解成為露宿者,只需要知道喺控訴呢個社會嘅扭曲、呢個政府嘅無理無良壓迫下,我哋所有人都係戲入面嘅露宿者。

↓撳個廣告可以支持大兄台繼續寫作↓

*寫咗一路都未post…連DVD同藍光碟都出咗,未睇嘅大家可以去各大碟鋪買嚟睇番。

電影獲得《第58屆金馬獎 最佳改編劇本​》

官方Facebook Page: 濁水漂流 Drifting

濁水漂流-電影預告

濁水漂流-故事簡介

電影係真人真事改編,故事主要講述男主角吳鎮宇謝君豪朱栢康李麗珍寶佩如等露宿者喺一次露宿者被清場嘅事件入面,佢哋係冇事先通知嘅情況下被食環、克警當垃圾咁清理,觸發佢哋搵社工蔡思韵協助,控告呢班所謂為市民服務嘅政府部門。電影入面刻劃唔少露宿者嘅生活同面對嘅難題,例如染上毒癮、就職困難、收入低落、上樓難等等,令到佢哋困咗喺一個輪迴咁。眼見以前都係低收入人士居住嘅深水埗一直被地產商開發,連僅餘嘅露宿空間都越來越少,咁露宿者最終又可以去邊度呢?

↓撳個廣告可以支持大兄台繼續寫作↓

《濁水漂流》
《濁水漂流》電影分享-露宿者需要嘅係公平唔係同情

電影感想-Raven

濁水漂流係繼上年幻愛之後一部我覺得好香港嘅電影,鏡頭拍到嘅係每日都見到嘅香港,但係呢個亦係一個好熟悉但係又好陌生嘅香港。喺濁水漂流呢套戲入面,導演有個位做得好好,就係故事情節唔會令到人有一種想同情幾位主角嘅心,但係就會有一種同佢哋一樣有嘅無力感,有一種好想控訴嘅情緒。就算身份幾低微都好,犯過法吸過毒都好,所有人都應該得到公平同平等嘅對待。因為社會並唔係有錢人就等於對個社會更有意義或者更有建設性,香港入面好多收入低嘅人先係維持社會運行嘅重要人物,我哋唔會因為地產商起多幢龍床盤樓而生活得到改善,但係我哋會因為清道夫努街上垃圾清走而行得舒舒服服,可惜個社會冇尊重到呢班收入低嘅勞工,更加壓榨佢哋。

電影入面加插好多新樓同舊樓共存嘅畫面,但係我哋唔會覺得香港係一個新舊可以共存嘅地方,因為我哋都知道無論戲裡戲外嘅香港,都係將舊事物、表面唔靚嘅事物想慢慢清走咁,換嚟可能係一啲新嘅高樓大廈、堂而皇之嘅大白象。

呢套電影嘅配樂做得好好,但好難文字表達得到,例如預告片第一個場景喺電影入面全段嘅配樂都好帶動到電影嘅節奏同情緒。

電影中段係有一段好有嘲諷嘅橋段,講社會上唔同嘅人各自有原因咁去「關懷」被無理清場嘅露宿者,例如有啲大學生OCAMP嚟「露宿初體驗」、有義工嚟免費幫露宿者剪髮、義診等等。但係故事結尾,露宿者再被清場嘅時候,場面冷清,只有一直協助佢哋嘅社工蔡思韵出現。究竟香港人係真係咁健忘,定係麻木咗?但係有啲事,我相信香港人一定會記一世!

另一套都獲得金馬獎嘅電影《美國女孩》都值得一睇:《美國女孩》電影後感

↓撳個廣告可以支持大兄台繼續寫作↓

↓撳個廣告可以支持大兄台繼續寫作↓