睇完《美國女孩》第一個感覺係：呢套戲真係好睇，冇晒咗時間入嚟睇。成套電影嘅節奏都好明快，故事圍繞住主角一家人喺台灣經歷一個中西文化衝突，家庭關係由愛轉為恨等等，唔似其他台灣電影咁煽情，反而令觀眾有種平淡嘅傷痛。
電影獲得 《第58屆金馬獎》最佳新導演、最佳新演員、最佳攝影
官方Facebook page: 美國女孩 American Girl
電影介紹
芳儀同芳安兩姐妹跟媽媽由美國坐飛機番到台灣同爸爸生活，以為只係短暫嘅逗留，點知因為媽媽嘅病，有機會以後都要留喺台灣繼續升學同生活，令到已經習慣美國生活嘅芳儀難以接受。喺學校面對住同學嘅排斥、課程嘅唔適應，由美國被認定係資優生嘅芳儀突然成為班中成績差，帶壞其他同學嘅壞學生。喺各種嘅唔滿意下，同患上癌症嘅媽媽喺生活上充滿衝突，芳儀認為美國先適合自己，好想盡快離開台灣，而媽媽因為擔心自己嘅死亡，亦都令到屋企其他成員充滿負面情緒。
美國女孩-主要演員
林嘉欣飾演媽媽-莉莉
莊凱勛飾演爸爸-梁宗輝
方郁婷飾演大女-梁芳儀
林品彤飾演細女-梁芳安
美國女孩-電影預告片
電影後感-Raven篇
同文章主題一樣，睇完戲就會諗番以前自己唔懂事，都有討厭過屋企人。雖然同電影入面嘅芳儀唔同，Raven並冇去過美國讀書，但都感受到對父母有千千萬萬嘅要求時，得唔到時嘅不快同不滿。而家回想以前自己唔成熟嘅諗法，亦都冇好好站喺父母角度諗同一個問題，呢個亦都係電影拍得好好嘅一點。以成年觀眾收睇，唔會睇完覺得個小朋友唔理性，反而係為一家人冇好好溝通而覺得可惜。
可能係華人文化，亦都可能係家庭問題，唔係每個父母或者小朋友都可以好好溝通大家嘅想法同要求。小朋友會認為自己搞得掂，大人會覺得自己已經為小朋友提供咗好多嘢，但雙方其實做嘅係可以更多。
電影入面對一家人嘅關係同感情都好寫實， 林嘉欣飾演嘅媽媽莉莉代表住西方文化、莊凱勛飾演嘅爸爸梁宗輝代表住華人文化，一個敢於表達自己對死亡嘅準備；一個對家人嘅愛、對死亡嘅避忌都好少親口表達。兩個人亦都因為咁唔直接溝通，拍出嚟嘅好多衝突畫面夠真實。
而電影另一樣我好欣賞嘅係演員嘅發揮，特別係兩個年紀輕嘅小演員，飾演姐姐梁芳儀嘅方郁婷更加憑呢部電影獲得金馬獎新演員，同埋飾演妹妹嘅梁芳安，兩位小演員嘅演出都相當自然唔造作。兩個人嘅對白亦都寫得好好，家姐係開口埋口都係黑心同超傷屋企人心嘅對白，細妹就係經常一語中的，好凸顯佢嘅小智慧。
