今年Apple宣佈將來會利用自家研發嘅ARM處理器取代Intel製嘅處理器，不過仲係開發緊嘅階段，所以今日發佈更新嘅iMac27吋同21.5吋都仲係用上Intel處理器，而27吋版本更加所有型號都換上Intel第10代處理器，另外所有型號都換上SSD嚟做儲存裝置，終於可以同HDD講BYEBYE！下面會再介紹有咩升級，如果有意換/升級/轉會嘅朋友可以留意吓~
iMac 2020硬件大升級但外表不變
首先大家要知道喺iMac2020嘅外表係同前幾代都冇分別嘅，不過硬件上就有唔錯嘅提升，下面會主要介紹27吋嘅型號，因為21.5吋版本好有可能會畀嚟緊年尾/下年年初嘅24吋iMac取代，而呢部24吋版本如無意外就會係採用Apple Silicon處理器，所以如果想買細尺吋嘅可以等多一陣。
iMac 2020 27吋版本有以下升級：
CPU：所有27吋型號都升級做Intel第10代處理器，用戶可以加錢升級做最高Intel第10代Core i9處理器。
RAM：所有型號都會配備8GB Ram，呢度先提醒大家千其唔好喺Apple度升級Ram，因為自行升級Ram可以抵好多，如果有需要嘅朋友可以用下面嘅購買連結買：買32GB Ram只需要港幣$1,007，由於iMac有4條Ram槽所以實際上用1千蚊可以升級到40GB Ram，足足慳咗4千蚊！；如果超高配置嘅64GB Ram都只係要港幣$1,945，又慳5千蚊。
顯示卡：全部型號都換上AMD Radeon Pro 5系顯示卡，效能上比上代更強勁，而且加錢最多可以升級做Radeon Pro 5500 XT 16GB，而呢個版本更加係砌機市場都提供唔到。
儲存：標配版係配上256GB SSD，大家可以視乎需要選擇升唔升級512GB或更大。如果有自行升級方法將來再同大家分享。
鏡頭：iMac 2020 嘅鏡頭升級做1080P，等大家Facetime嘅時候，可以拍得自己更加清晰。
連線傳輸：標配有Gigabit Ethernet，加港幣$750可以升級做10 Gigabit Ethernet，相信Studio用戶或者有用支援10 Gigabit 嘅NAS用戶值得升級呢個功能。WiFi方面未有支援最新WiFi-6規格，但係藍芽方面升級到Bluetooth 5.0。
螢幕：採用5K解像度，而且加入True Tone原色調功能，螢幕色彩可以跟據用戶環境嘅光源作出調整，呈現較真實嘅色彩；如果你一直都縑iMac螢幕反光問題好嚴重，今次Apple畀機會用戶加錢升級埋「Nano-Texture 玻璃」，呢個技術(其實係同磨砂相似嘅技術)就同iMac Pro一樣用嚟減少反光問題。
資料及圖片來源：Apple
