如果上年6月到而家你都仲未買過VPN，咁你真係好大膽！今次會同大家介紹番幾個討論度高啲嘅VPN，等你上網都多一重保障！仲會教埋你點揀VPN公司，同埋其他保護自己嘅方法。
使用VPN嘅好處
首先要講嘅係：唔係用咗VPN你上網講嘢就100%安全！但係你用咗VPN之後，所有連線都加密咗，你嘅上網公司或者政府都會難以追蹤你上過咩網，就好似隱左身咁。例如你手提電話係用CSL，你上連登嘅話，佢係可以追蹤到你幾時上同上幾耐，而用咗VPN之後，電話嘅連線會經過VPN之後再番去電話/電腦上面，咁CSL就難啲追蹤你喇。當有咩事畀人查，咁都難啲搵到相關資料。
有唔少人上網睇劇或者片可能都會遇過地區問題而冇辦法睇到想睇嘅嘢，而VPN喺呢一方面就可以幫你扮成你係喺當地，呃咗佢哋嘅呢種ip防禦，不過由於你有屎橋，啲片商好似Netflix咁，都係有方法分辨到，咁就要睇吓你揀嘅VPN公司喺呢個問題投放幾多資源同努力喇。
同理，如果你有打開日本game都可能遇過封香港ip問題，咁呢個情況都係可以透過VPN連線到日本伺服器，解決畀人ban ip嘅問題。
使用VPN之後連線都被保護同加密，所以平時屋企上網又好，出街連去免費wifi又好，都可以保護自己嘅資料唔會咁易畀第三方包括政府同hacker追蹤到。
如果你仲有BT下載嘢，咁政府部門都難啲這蹤你真實ip從而搵到你，咁就難啲捉你告你下載/上傳盜版嘢喇，雖然呢樣嘢外國就比較捉得緊。
使用VPN嘅壞處
好似上面咁講，其實當你連線到VPN嘅伺服器，你嘅連線係先經過一次VPN，畫面再出現喺手機,所以會用多咗Data㗎！所以如果你本身個Plan係夠用嘅，但係用咗VPN之後係好大機會爆Data嘅。
另外，因為隔咗VPN嚟連線，所以上網速度係會有一定嘅下降，但係會下降幾多呢，咁就視乎你用嘅VPN伺服器速度同該伺服器同你上嗰個網嘅伺服器個地理距離有幾遠喇，越遠就越有機會越慢。
如果你揀嘅VPN公司並唔可靠，咁你嘅所有連線資料都有可能畀佢拎嚟賣，或者追蹤你，最後令到你畀執法機構可以搵到你。
一個好嘅VPN，或者功能同保護性再強啲都有可能好貴，大家可以留意吓。
VPN推介：Surfshark
Raven上年其實自己分別試用過幾款VPN，最後繼續用緊嘅係呢一間。佢有咩好呢咁？首先係佢係冇設備上限嘅，咁你一個ACC就可以幫你同屋企人裝晒，慳番好多錢。而佢嘅註冊地係英屬維爾京群島，並唔屬於任個一個情報聯盟國家，所以就唔受指定法例保障，就算你畀人查，Surfshark都唔會提供你嘅資料。Surfshark亦都唔會紀錄你嘅連線，包括由咩ip連線到邊個伺服器、連線速度、連線到咩網站等等。價錢上真係好平！連線速度亦都唔錯，不過Netflix就連線得較慢。
如果想買Surfshark可以用以下連結購買：link
Nord VPN：都可以考慮
做得最多Marketing嘅Nord VPN，相信大家都睇過唔少人推介呢款。咁我就簡單講吓點解唔用佢，試用嗰陣其實速度同surfshark相差唔遠，但係佢曾經畀人hack過而且處理手法就麻麻，雖然有人會話係競爭對手煲大件事，但係做人有公關，佢就淨係做Marketing，近日連登都有o放咗話上網隨手一撳都qt到唔少acc流出，安全性高定低就自己考慮啦，我當時試完就退錢離場。
Express VPN：避得就避
呢間亦係相當有爭議，價錢最貴之餘，香港公司背後究竟有冇中國背景？有人話有，有人話冇。不過，如果你目的淨係跨區睇Netflix就可以考慮囉。
淨係用VPN就夠？ NO！
當你每日用緊FB打卡，IG又up自拍，打機同啲網站都用FB login，仲要連咗電話號碼入去，咁你有VPN其實同冇用冇分別。政府要查你個FB可能一次起得晒你底。又好似你買嘢用信用卡，就算查唔到你幾時上邊個網買嘢，但係你信用卡有紀錄，都係追蹤得到你。又好似你每日用微信支付，支付寶，抖音呢啲毒app，你唔係以為連咗VPN，大陸會搵唔到你掛？
做人唔好咁天真，既然你要隱身，你就要做得盡啲，太空卡加部替換嘅手機，加一啲唔會有個人用途嘅社交賬號，最好連GPS相關嘅功能停用，確保VPN長期連線，或者有開Kill Switch功能。
仲有，唔好再用Google Chrome上網，盡量使用可以減少被追蹤嘅瀏覽器，例如Firefox或者使用Tor技術嘅瀏覽器。同埋再次提醒大家唔好用呢啲Browser都仲登入番個人社交平台做平時會做嘅嘢。
