話說最近Dyson香港官網減價，一部Dyson Digital Slim Fluffy Pro吸塵機只係需要$3,555，價格比起好多水貨款都抵，所以Raven就喺官網落單買咗一部，2日後就到手都算幾快。但係一切令我對Dyson呢個品牌極度失望，就由打開包裝盒開始… 話說呢個model除咗有一部吸塵機，仲會有一個充電收納架，但係收納架竟然畀少咗「一嚿膠」，發現之後我就當然即刻影相send email去Dyson啦，第二日朝早仲打電話去Dyson熱線，但係過咗48小時我都未知究竟幾時先正式幫到我解決問題…
Dyson Digital Slim Fluffy Pro 開箱
少嚿膠有咩問題？
我都好想同其他人一樣，買完一支Dyson吸塵機番屋企就可以安安心心咁吸塵，但係充電收納架最重要嘅支架竟然少咗一嚿膠！可以睇留下面兩張圖，左邊係正常嘅，右邊係少咗紅色嘅膠。
正常 唔正常
咁呢嚿膠有咩用？係當你將呢支柱固定住上面嘅收納架同下面嘅底座，即係下面張圖咁：
但係而家少咗嚿膠，呢支柱插住之後，一係就係上面唔穩，一係就下面唔穩。估唔到第一次買Dyson吸塵機，竟然發現佢哋QC咁差，仲因為呢個咁低能嘅原因要去聯絡CS。
聯絡Dyson客服過程
開箱當晚我就即刻E-mail畀help@dyson.com.hk，send完之後，連auto-reply都冇，我連佢有冇真係收到我嘅求助都唔知。咁佢官網話有livechat，但係我睇過日頭同夜晚都搵唔到邊度有…咁即係冇啦！第二日朝早我見email都係冇人覆，心急人上身，就打電話去佢哋CS電話，講完一輪佢哋確認到我收到嘅Product真係有問題嘅，之後再解釋番我已經sd過email提供咗相，CS就話會盡快聯絡番我，之後就收線。
到晏晝都未有人覆email同電話，再打一次去個CS電話，今次接電話嘅就再解釋話，原來個問題需要交畀另一個部門，嗰個部門最快都要一星期先會聯絡我，到時先會解釋究竟點樣處理呢個問題…(當時我就諗喺香港做客真係閪)…我再問下產品上呢啲問題想退款退款需要點做，CS嘅回覆係都係要等嗰個部門確認…
所以而家我就要等Dyson嘅回覆，同埋將部吸塵機放喺一個唔穩嘅收納架上面…
如果畀我再揀，我唔會喺Dyson官網買佢嘅吸塵機，更加唔會推薦人去買呢個brand嘅其他產品！