相信大家都已經喺電話度安裝咗Signal同Telegram喇！唔計番工或者某啲chat轉唔走，各位用Whatsapp咁多年嚟儲落嘅對話紀錄以前都搬唔走。不過Telegram最新嘅update入面，就新增咗一個功能，就係畀用戶可以喺Whatsapp個人同群組嘅對話紀錄匯出到Telegram，詳情請睇下面嘅介紹。
點樣將Whatsapp對話紀錄轉過去Telegram？
個人方面比較容易，iPhone用家個步驟係咁：
- 打開「Whatsapp」
- 揀番你想轉走嘅「對話紀錄」，由人名嘅「右面」掃去「左面」
- 會有「更多」同「封存」，揀「更多」
- 揀番「匯出對話紀錄」
- 可以選擇保留或者放棄對話入面嘅多媒體檔案
- 經過一段等候時間，會彈出匯出到咩地方，如果選擇其他途徑會變做匯出.zip壓縮檔，呢度大家揀番「Telegram」
- 畫面會自動打開「Telegram」，你需要揀番將個對話紀錄匯入去邊一個用戶嘅對話入面
- 經過一段匯入時間，視乎檔案大小，對話就會成功匯入
Android用家個步驟都好相似：
- 打開你想備份嘅對話
- 右上角揀「⋮」
- 之後揀「更多」
- 再揀「匯出對話」
- 之後揀番匯出到Telegram
群組方面嘅步驟都類似，不過就建議大家匯出去Telegram嘅時候，可以用一個全新嘅Group Chat，會比較方便。
Telegram官方嘅教學: Link 有好多gif圖畀各位跟住做都好易
遇到嘅問題
步驟看似簡單，但親身試過係失敗嘅。喺Telegram隻鴨仔食緊啲紀錄嗰陣，原本紀錄大小係1.5GB，但係過咗幾百MB之後就彈咗，原因暫時都唔係好清楚。有可能係之前由Android轉會嚟iPhone嘅時候，用第三方提供嘅備份方法將原本嘅Whatsapp紀錄轉過嚟，有啲嘢出錯…呢個問題正正係Whatsapp最大嘅問題！Android用家用Google Drive備份，iPhone用家用iCloud備份，不但唔可以隨時轉第二部電話，仲可能損失所有對話紀錄。
↓撳個廣告可以支持大兄台繼續寫作↓
當時我都有寫到篇教學講點轉：Whatsapp紀錄好重要！Android轉會iPhone用家必學(真係好有用) 不過而家大家都轉會去Telegram就唔洗再畀呢個問題煩住。
究竟轉去Telegram定Signal好？
今日特登上網睇番Telegram嘅優點同缺點，可能大家都有睇過類似嘅比較，所以我直接講咗我嘅睇法先。轉會去Telegram定Signal好呢個問題，我覺得首要係離開Facebook同Whatsapp，最好放棄埋IG啦。其次係，Signal同Telegram冇話其中一個一定安全，始終呢一刻安全唔代表下一秒仲安全。實際上，兩個App喺保障用戶私隱上都有唔同嘅方法，Signal就比較似Whatsapp，所有對話，包括Group Chat都有End to End (用戶到用戶)加密。Telegram預設嘅所有對話，都只係利用End to Server (用戶到伺服器)加密，私人對話要另外開啟番Secret Chat，先會有End to End加密。而呢個都算係Whatsapp/Signal同Telegram最大嘅分別。下面我做咗少少資料搜集，大家可以睇吓Telegram嘅保密同安全值唔值得你信任。
Telegram嘅特色/優點/缺點
- (優點) 開源，所有程式碼都係公開，所有人都可以睇到，相反Whatsapp係封閉程式，所有嘢都係Facebook公司控制
- (優點) 遠離Facebook，冇人想再畀呢間公司收集更多嘅用戶資料
- (優點) Cloud backup所有對話，所以可以同時+即時咁喺唔同設備上使用同查閱所有對話內容，就算你熄咗電話，你都可以喺電腦收發訊息
- (缺點) 需要用電話號碼註冊帳號（可用太空卡號碼）
- (缺點) 加密方法受質疑
- (缺點) 只有Secret Chat支援Eng-to-End加密（Telegram加密嘅出發點同Whatsapp完全唔同：Link1 Link2 )
簡單嚟講Telegram想指出嘅係：
Whatsapp用戶之間嘅對話係End to End加密，係好安全嘅，前提係你冇用Whatsapp Backup功能。因為當用戶使用備份功能，所有資料都會上傳到Google Drive (Android用戶)或Apple iCloud (iOS用戶)，當中嘅資料並冇加密嘅（iOS備份加入咗加密，但係Whatsapp即Facebook單方面擁有加蜜金錀，即係佢口同你講你嘅資料安全，但係一路睇緊你嘅對話）。所以當不法份子可以傳取你Google Drive或者iCloud或者Whatsapp或者Facebook嘅時候，你嘅資料就完全冇任何保障。
Telegram嘅對話預設係冇End to End加密，所有對話只係喺伺服器層面有加密，如果伺服器被不法份子入侵，用戶資料就好有可能會洩露。但係Telegram指所有用戶對話資料都係分開存放喺全球唔同嘅伺服器，加密金鑰亦都係被分成多個部份存放喺唔同國家地區嘅伺服器入面。（我估意思係就算今日有政府要查我，Telegram即使要喺香港伺服器入面搵都唔會搵到我嘅加密金鑰，所以對話內容都係喺加密嘅情況。我真係估）
最後又講多次，世上冇任何一樣嘢係永遠安全，今日未畀人洩露唔代表聽日唔會，所以自己小心使用所有App同工具先係保護自己最好嘅方法。
資料來源：Telegram
↓撳個廣告可以支持大兄台繼續寫作↓
圖片來源：Dimitri Karastelev @ unsplash
