今時今日連出個街可能都要打針，真係多得個政苦唔少，咁如果困足屋企冇嘢做，除咗玩手指之外，有上網嘅你又點可以唔考慮下訂閱是但一個OTT嚟解悶呢，今次同大家比較下香港幾比較多人用嘅煲劇/煲戲嘅OTT平台。(OTT即係Over The Top，即係透過互聯網提供嘅影音平台)
六大煲劇/煲戲平台簡介
| Netflix | Viu | Disney + | HMVOD | NowE | 同場加映：ViuTV | |
| 基本月費 | $63-$93 | 免費/$21-$51 | $73 | $48起 | $78 | 免費 |
| 畫質 | 最高為4K* | 最高為1080P | 最高為4K* | 最高為1080P | 最高為4K* | 最高為1080P |
| 平台賣點 | Netflix Original、劇集/電影 | 韓劇、日本動畫、Viu Original | Marvel、Star Wars等經典IP作品、Disney+ 獨佔劇集/電影 | 大量電影、劇集、兒童內容 | HBO GO、爆谷電影、MovieMovie、Viu同ViuTV內容 | ViuTV自製內容 |
| 秘技 | 透過VPN可收看不同國家的專屬內容 | 透過VPN可收看不同國家的專屬內容 | 透過VPN可收看不同國家的專屬內容 | / | / | / |
Netflix: 香港應該最多人識喺度煲劇
講起最多人用嘅OTT，相信香港最多人識同畀錢訂閱嘅就係Netflix。早幾個月爆紅嘅《Squid Game魷魚遊戲》、《Too Hot to Handle 慾罷不能》、或者早幾年嘅《Kingdom 李屍朝鮮》、《全裸監督》、《Sex Education 性愛自修室》全部都係Netflix獨佔內容，而且佢哋一直喺獨佔內容出力。另外，佢哋亦都有買到好多唔同種類嘅內容，包括新舊嘅電影、電視劇、綜藝節目、兒童內容、紀錄片等等，內容嘅量絕對可以滿足到大部份用家。
秘技：只要大家用VPN連去其他地區，就可以睇到其他地區先有嘅內容，間接增加可以睇到嘅內容數量。大家可以用大兄台嘅連結訂閱Surfshark VPN，$466就可以用到26個月，平均1個月月費唔洗$18。
Viu: 成日畀人嗌錯名
無論網民同藝人都成日叫錯ViuTV做Viu，其實「Viu」應該係黃色Logo，比起藍色Logo嘅ViuTV更早成立，最主要係煲韓劇同日本動畫，而且基本上係免費任睇。Viu嘅賣點係佢哋所有內容都提供中文字幕，而且新集數比起翻版網更新得更快，如果Viu有得睇，冇可能去睇翻版。
韓劇迷除咗可以睇到最新嘅《Ghost Doctor》、《讀取惡心的人們》，仲有好多已完結/經典韓劇，有啲仲有廣東話配音。動畫迷亦都唔可以錯過Viu，因為《無職轉生》、《鬼滅之刃》呢啲人氣動畫都睇到，而且每一季都有幾套新番動畫睇。最近佢哋仲買咗幾個人氣極高嘅韓國綜藝，好似劉在石嘅《玩甚麼好呢》、國民綜藝《2天1夜》、姜虎東嘅《認識的哥哥》。
Viu其中一個比較失敗嘅位係如果想喺電視睇，佢個電視App只係支援Samsung/LG電視機、Apple TV，好多Android TV都睇唔到，雖然網上面有網民改咗個App，但係穩定度低亦唔一定成功睇到。
秘技：Viu App除咗香港用到之外，其實連VPN去泰國、菲律賓、新加坡，都可以睇到佢哋嘅內容，鍾意韓劇/韓綜嘅朋友一定要留意下，因為佢哋比起香港有更多節目！大家可以用大兄台嘅連結訂閱Surfshark VPN，$466就可以用到26個月，平均1個月月費唔洗$18。
Disney +: Marvel迷訂一個月應該夠睇晒
香港最新嘅OTT就係Disney+，賣點當然係佢旗下嘅各大經典內容：Marvel、PIXAR、Star Wars、National Geography等等。就好似《Loki》、《Hawkeye》呢啲Marvel超級英雄獨立電視劇相信都係好多英雄迷課金原因之一，不過Disney+呢個平台普遍評價都麻麻地，喺唔同地區都出現過連線問題、App入面有唔同嘅Bugs、新增內容太少等等。
Disney+係咁多個OTT平台入面支援最多設備嘅，由唔同嘅電視品牌、電腦瀏覽器、手機之外，連Play Station同Xbox都可以睇到，PS5冇Game玩可以用嚟睇Disney+囉。
HMVOD: 少有平台有愛情動作片選擇
HMVOD嘅內容主要係電影，另外亦都有買到唔少電視劇同兒童內容，以電影為例，蜘蛛俠系列由Toby版、Garfield版都有齊，再加頭2集Tom版，而上年嘅大片《Dune 沙丘瀚戰》、《失靈腦朋友》都有得睇。
呢個平台最有趣係佢有一系列日本愛情動作片，數量好似都唔少。
比起其他平台，HMVOD除咗月費之外，部份比較新嘅內容就需要用點數嚟收睇，月費計劃每個月會送60點，之後有最新嘅內容想睇就可能要再入錢買點數喇。
NowE: 香港得呢度睇到HBOGO
可能香港嘅網民認識NowE係當年《Game of Thrones 權力遊戲》最後一季、又有可能係睇英超西甲嘅波友、或者係因為上年東京奧運。講番NowE嘅賣點就係睇到HBO GO，所以好經典嘅《哈利波特》、DC系列作品同最新嘅《Peace Maker 和平使者》、外國評價好高嘅《Euphoria 毒癮女孩》等，電影亦都有好多新片，好似《Dune 沙丘瀚戰》、《The Suicide Squad 自殺特攻》都有。
以NowE嘅Plan嚟睇，係最複雜同混亂嘅，佢哋最新由Edan@Mirror代言嘅「連環娛樂組合」就月費$78，可以睇到HBO GO、 Now 爆谷、 MOViE MOViE PLAY、 Viu同ViuTV提供嘅內容；又有一個「娛樂組合」，月費由$78-$88，可以睇到Now TV幾個收費劇集台 (劇集台、華劇台、Express劇集等)、Now Sports Prime、Now Sports 1台等。如果淨係鍾意睇戲同劇嘅，建議就訖閱番有HBO GO嘅計劃，因為HBO GO都係其中一個獨佔內容品質最好之一嘅。
ViuTV: 劇集綜藝免費任煲
唔想錯過同其他朋友、同事嘅話題，最好就緊貼住ViuTV嘅節目喇，無論係之前完咗嘅《全民造星IV》，聽日就會播完嘅《膠戰S2》，定係而家仲播緊嘅《IT狗》，全部都係可以網上面免費睇番，部份上架較耐嘅集數需要登入ViuTV會員先睇到。
總結
當YouTube都已經冇片可以滿足唔到你，其實都建議大家訂閱一個OTT，冇嘢做就可以隨時開嚟望下有咩新節目睇，收費嘅可以考慮Netflix/NowE，免費嘅就可以考慮下Viu/ViuTV。翻版網記得盡量避免睇啦，如果正版網有得睇，真係冇理由要去翻版網睇。
最後分享番之前寫過嘅一篇VPN文章：如何選擇適合自己的VPN？
