今次同大家介紹嘅烏冬店：讚岐烏龍麵志成，係大濠公園站附近嘅排隊店，餐廳喺2019年得到米芝蓮推薦，味道真係好好味！無論係烏冬嘅口感、湯底同天婦羅嘅味道都係喺福岡自由行食過食深刻好味，如果會去大濠公園觀光，好推薦大家嚟試吓！下面會分享今個旅程中食嘅兩碗烏冬同落單教學，繼續睇落去啦！
烏龍麵志成 食物
呢度主要食湯烏冬同冷烏冬，另外配上各款天婦羅，大家可以參考吓下面嘅餐牌。呢度嘅烏冬量亦都可以自己揀，每碗預設係300克，如果想食多啲，加90 YEN就有400克、加180 YEN就有500克，如果胃口細嘅朋友就可以選擇250克重嘅烏冬量，仲可以減50 YEN。
烏龍麵志成 餐牌
而今次我哋叫咗兩碗烏冬同一個小食，分別係天盛湯烏冬、黑咖喱烏冬、明太子炸米餅。
天盛湯烏冬
呢個天盛湯烏冬，無論係讚岐烏冬麵條、湯底、天婦羅都超好味。烏冬口感外面彈牙，入面軟熟；湯底味道濃淡適中，而且口感好清；天婦羅每件炸衣好都炸得超脆，而且一啲都唔會過厚。
↓撳個廣告可以支持大兄台繼續寫作↓
黑咖喱烏冬
而呢個黑咖喱烏冬係當時嘅新品，咖喱湯相當濃厚，啱晒重口味嘅人。而烏冬撈勻食，每條都掛汁，所以真係啖啖咖喱味，不過食到尾感覺太膩。而烏冬上面嘅豬肉炆得好軟熟，加埋一粒炸温泉蛋，相當滿足。
明太子炸米餅
呢份炸米餅口感幾煙韌，外面炸得脆卜卜，入面因為係米糕咁所以口感仲有啲軟糯。配埋紫菜同明太子，味道由原本十分清淡變得香口惹味。
烏龍麵志成 落單方式
喺門口排隊嘅時候，店員會逐一派餐牌同點餐。店員手上應該有日文、英文、韓文餐牌(印象中好似冇中文)，你可以揀一份嚟手指指同店員落單。佢會寫低你點嘅食物，之後有位入座之後，食物煮好後就會送過嚟。
烏龍麵志成 餐廳環境
餐廳唔算好大間，大概有20以內嘅座位。如果大家有機會坐喺吧台位，就可以睇住廚師煮烏冬，炸天婦羅嘅過程。如果坐喺餐廳靠窗嘅位置，氣窗會有風吹入嚟，會比較涼爽。
↓撳個廣告可以支持大兄台繼續寫作↓
烏龍麵志成 店舖位置
只要乘搭福岡地鐵到大濠公園站4號出口，大概行5-10分鐘就會揾到餐廳。大家可以follow 烏龍麵志成嘅Instagram，佢哋如果營業時間有更改都會出post講。
同場加映：
