Elder Burger呢間韓國本地Burger店Raven早喺幾年前喺外國網站就見到，今次到首爾旅行梗係立即去試吓啦！地點位於近年人氣好高嘅聖水洞，附近有唔少cafe，亦有韓國人氣潮牌emis聖水店，所以週邊人流都唔少。而Burger味道亦都相當高水準，無論係漢堡包、漢堡、配料等都係相當好味，超推介大家嚟試吓！
初嘗高評價Elder Burger
今次總共叫咗兩個餐，兩個餐嘅小食都升級咗做洋蔥圈，所以冇試到佢哋嘅薯條。相片入面可以睇到burger可以揀就咁上，或者用鍚紙包住上，下面教學會教大家點樣揀。
Belly Burger (左)& New Classic (右)
冇用鍚紙包住嘅係Belly Burger，入面夾住切到好似煙肉厚嘅五花肉，加埋煎蛋、牛肉漢堡、芝士等，味道香濃，而burger用上嘅麵包烘完之後外面脆身，內裡口感好鬆軟，整體口感超夾。
而用鍚紙包住嘅係New Classic，入面嘅漢堡牛肉味夠香濃，夾住嘅洋蔥都多汁香濃好好味，配搭埋醬汁超好味，都係值得一試。
落單方法
比起要同韓國侍應落單this this this，喺Elder Burger落單就比較簡單，同日本食拉麵一樣都係喺售票機度撳撳撳就可以落單，下面就同大家解釋吓幾個主要畫面：
選擇套裝叫法：揀menu第二個tab
之後就可以揀返想食嘅burger，個system會識自動跳去下一頁。
售票機左面有貼到張紙介紹幾款burger，大家可以跟返張相去揀。又或者大家可以去店內嘅牆身睇一次成個menu，之後再去點餐都得。menu會放喺下面少少畀大家做參考。
調整套餐飲品/小食/配料等選項
揀完burger之後，第1個選項就可以揀返跟餐飲品，主要都係汽水/咖啡等。
第2個選項係小食，可以揀食薯條，或者加2000won升級做洋蔥圈。Raven推介大家轉食洋蔥圈，佢嘅啤酒粉漿炸完個洋蔥圈超級脆，而且炸衣超薄，洋蔥仲厚身多汁，整體味道口感都超正！
而選單第3項就係揀加唔加burger嘅配料。
第4項就係揀burger使唔使用錫紙包住上餐，左係要，右係唔使，兩個選擇都係免費嘅。如果你鍾意食完小食先食burger嘅，就建議用錫紙包住，可以保暖；又或者如果你擔心burger滴汁，都可以揀用錫紙包住。
畀錢同拎號碼機
揀好食物之後就可以畀錢埋單，Raven就用WowPass畀錢，之後售票機會出收據，畫面亦會顯示單number，最後就喺售票機右機拎最底部號碼機返埋自己位就得。
食物準備好之後，號碼機會有震動提示你去拎餐。
想知咩係WowPass，即睇WowPass介紹同教學
Elder Burger Menu
大家仲可以FollowElder Burger嘅instagram睇佢哋最新消息。
Elder Burger 位置
除咗位置喺聖水洞之外，其實附近就係首爾森林，如果大家秋天嚟到首爾，都可以坐喺公園，一路感受秋天黃色嘅銀杏+紅色嘅楓葉景色，一路品嘗好味嘅burger。
