想擁有自己嘅網站，首先要諗好你想要嘅嗰個網域係咩？所謂嘅網域(Domain Name)即係youtube.com、www.gov.uk、www.adidas.com.hk呢啲咁，可以有www，又可以冇www，亦都可以係.com，又可以.hk咁。網域(Domain Name)就好似電話號碼咁，搵一個地方登記咗之後，全世界嘅人都可以用瀏覽器輸入番個網址嚟搵到你嘅網站(唔包括某啲有偉大防火牆嘅國家)。咁下面就會介紹番喺邊度可以買/註冊網域(Domain Name)。
簡單講解網域(Domain name)同網址(url)分別
一個完整嘅網址可以簡單理解為3個元素／部份，包括[https://]+[www]+[example.com]。
第一部份係prefix，即係http://或者https://，而呢個部份屬於伺服器嘅設定，之後會有文章再分享，主要分別係https係而家主流嘅標準，屬於有加密嘅通訊規則，http就冇加密嘅，容易啲畀人追蹤到上網內容（中國係其中一個Ban咗https嘅國家）。
第二部份係sub-domain，即係www。呢個部份都係屬於伺服器嘅設定，之後會有文章再分享，但係主要分別係瀏覽者上網站主要嘅時候，係上example.com定係www.example.com。另外，sub-domain仲可以喺其他地方出現，例如hk.yahoo.com就係其中一個例子，yahoo.com係主網域，hk.yahoo.com入面嘅hk就係sub-domain，可以定義為yahoo.com想用hk呢個sub-domain嚟分番香港內容，tw.yahoo.com就係台灣內容咁。
第三部份就係domain name，即係咩咩.com、咩咩.hk、或者咩咩.io呢啲，亦係呢篇教學嘅主要內容，當中網域(Domain Name)係由name同extension組成。
下面會用例子介紹番：
假設你想要一個網站係蘋果是個好東西，咁Name就咁釋就會係appleisagoodthing，而extension可以用.com之外，其實都仲有好多唔同類型嘅選擇，可以係appleisagoodthing.net、appleisagoodthing.ai、appleisagoodthing.shop咁。
喺邊買/註冊網域？點買先最抵？
今次嘅文章最主要都係想分享呢一part，咁究竟係買定係註冊呢？其實可以理解做同一樣嘢，因為註冊完／買完係要每年續，個網域你先可以繼續持有，只要唔續約都會空番出嚟畀其他人。唔同地方註冊同一個網域都可能有唔同嘅價錢同附加費用，如果大家Google搜尋[Domain Name Registry]，相信會搵到其實真係有好多唔同網站都提供網域註冊，下面我會用幾間外國比較大嘅註冊網站嘗試註冊appleisagoodthing.com作為例子同大家比較下嘅。
GoDaddy: 貴夾唔抵
唔知點解香港好似都幾多人會幫襯GoDaddy唔同嘅服務，可能真係多廣告，但係其實佢哋價錢真係好唔吸引，新登記註冊+1年登記嘅費用係US$11.99。
GoDaddy登記時間如果拖長，每年續嘅費用高達US$18.99，咁一次過畀5年嘅登記費就足足要US87.95。
Namecheap: 抵買呀
呢度可以睇到Namecheap度註冊同登記1年嘅費用係US$9.06。
喺Namecheap度登記時間越長，優勢就越明顯，5年嘅費用加埋只係US$45.3，比GoDaddy平接近一半。
Google Domains: 新加入市場都唔錯
2023年8月更新：Google Domains已經將相關業務出售畀網站製作平台Squarespace，現時上Google Domain仍然係Google嘅介面，外界估計成個交易將於2023年第3季完成，屆時所有Google Domains現有客戶都會直接轉移至Squarespace。
Google其實近年喺呢個伺服器行業都開始努力，而綏域註冊都係其中一個服務，咁佢新登記加1年註冊費係US$12。
而喺Google用5年，加埋都只係US$60，都唔算貴。
Domain.com: 貴夾唔抵
如果喺Domain.com註冊同登記1年，價錢係US$8.99。
一次過登記5年就係US$52.95，唔好以為咁樣係抵喎！
註冊網域有咩要注意？
點解Raven會話Domain.com註冊會唔抵呢，大家可以留意下我有揀到[Privacy + Protection]，需要另外收費，另到1年收費變成US$17.98，5年就係US$97.90，咁個價錢就同GoDaddy一樣唔抵用喇。咁咩係[Privacy + Protection]，頭先又唔提呢？
網域嘅Privacy(隱私)問題
一個網域就好似文章之前提過咁好似一個電話號碼，你登記嘅時候需要填寫番唔少嘅個人資料，包括聯絡人姓名、電話、地址、電郵等等，目的係畀全世界嘅人都可以透過一個叫WHOIS(ICANN)嘅資料庫搜尋到網域嘅登記人。大家可以上呢條link: ICANN Lookup輸入唔同網站就可以睇到網站登記資料。因為唔希望個人資料咁容易就畀不法嘅人拎去，唔同網域註冊商都會提供埋一啲[Privacy + Protection]嘅附加服務畀用戶，喺WHOIS(ICANN)資料庫入面隱藏資料。下面係bigbrotherchannel.com嘅使用例子：
上面可以睇到因為大兄台網域用咗Namecheap嘅保護服務，網域嘅真正聯絡人(我)會隱藏咗。而Namecheap、Google Domains喺收費入面都已經包咗，反而Domain.com就另外收費，而且價錢都幾貴。相信GoDaddy有一半收費都係Charge咗呢個保護服務，所以收費都咁貴。
網域嘅Protection(保護)問題
其實登記註冊完網域之後，個網域就係屬於你嘅，咁你都唔會想佢突然間畀人偷咗啩？所以保護個網域都好重要，通常註冊網域之後，註冊商都會幫你鎖定個網域，令其他人唔可以用不法方法去轉讓你嘅網域；亦會幫你打開自動續約功能，令你唔會錯過續期而喪失網域。
總結
想擁有屬於自己嘅網站，需要先去註冊一個想要嘅網域(Domain Name)。坊間有好多唔同嘅註冊商提供網域註冊，Raven會推介大家去外國規模較大嘅網站，例如Namecheap或者Google Domains，註冊費用較低而且價錢已經包含基本隱私保護功能，好適合啱啱接觸註冊網域嘅朋友，希望以上內容幫到大家。
