嚟自英國嘅DYSON絕對係無線吸塵機界嘅名牌，大家未必細細個就聽過呢個名，但係不論係朋友間定係網絡上面，都好容易見到唔少人追捧佢哋嘅吸塵機、風筒、風扇等等嘅家庭電器。繼自身經歷喺香港官網買過一部DYSON Digital Slim Fluffy Pro吸塵機之後，我就決定以後唔會再幫襯佢哋。為咗打算買DYSON吸塵機/其他電器嘅各位，希望你哋會覺得呢篇文章有用。
重點一：買DYSON產品前請先詳細睇吓苦主Group
自己都係苦主之一，好可惜我係買咗部吸塵機之後先知有呢個Group (Dyson香港 捷成維修苦主群組)，如果一早知道，可能都會打消咗買Dyson吸塵機嘅念頭。Dyson嘅吸塵機價錢真係唔會用平嚟形容，售價最低嘅model可能都要3千蚊，再新啲同高級啲嘅model更加要6千幾蚊，各位買家都會想一分錢一分貨，想件貨好用又用得耐。但係各位買之前只可以祈求自己人品好，平時有日行一善，唔洗有機會遇到保養維修問題要聯絡香港嘅代理商。
上面只係少少例子，香港有唔少買家都遇過官網買嘢遲遲未送貨、產品維修拖2-3個月都未完成等等，希望大家買DYSON前了解到呢啲風險。
重點二：再好嘅產品，DYSON售後服務差都好趕客
雖然上圖最左上面Dyson喺Facebook宣佈佢哋已經開咗新嘅維修中心，但係唔少留言入面都見到暫時都冇改變到上述提嘅問題。
↓撳個廣告可以支持大兄台繼續寫作↓
相信好多人買電器都唔想有機會遇到壞機要做維修，往往用家需要做保養維修，都會想產品代理/維修可以有效率咁將電器維修完送番到用家手上。仲記得好耐以前，HTC嘅香港代理喺用家維修電話期間，可以借用一部電話，等用家可以喺冇電話用嘅時候有部後備機緩解燃眉之急。而香港DYSON除咗唔會借機之外，仲會拖你個零兩個月，就算報晒消費者委員會都冇用，明明係冇零件維修，就會拖一排先話未有零件，明明係冇貨，就會拖一排先話調緊貨。
之前分享過自己由官網訂購Dyson Digital Slim Fluffy Pro吸塵機，上面就係一開箱發現缺少零件開始send email到打電話到佢哋客服過程入面嘅紀錄，成個過程相當痛苦，加埋佢哋絕對係有拖延同欺騙嘅成份，過程入面我都有去消費者委員會投訴(佢哋可以做到嘅嘢其實真係唔多)。到2月17號佢哋寄一個無效嘅優惠碼畀我，到3月2號成功退咗錢之後，我就決定唔會再考慮DYSON嘅其他產品。
重點三：DYSON絕對係品牌效應嚴重超過產品價值嘅品牌
Dyson嘅Marketing當然做得好好啦，KOL又推，科技媒體又推，但係買咩嘢之前一定要三思，一個咁高價錢嘅產品背後消費者又承受嘅後果唔係普通金錢損失，仲有時間、心力等等。好地地一個英國品牌嚟到香港畀一間垃圾代理咗，以支Dyson Digital Slim Fluffy Pro嚟講，真係好輕身，吸力亦都好足夠日常吸地吸床用，但係因為售後只係會不斷浪費大家時間，就已經嚴重影響一定數量嘅潛在買家對Dyson形象同產品嘅諗法。
希望你睇到呢一度可以諗清楚自己係咪真係要買呢個品牌嘅產品，如果說服唔到你，我都會用呢篇文章祝福你唔會用得著佢哋嘅售服同維修服務 Good Luck！
