Raven同女朋友喺啱啱10月中去完首爾旅行返嚟，全程使用WowPass作為預付卡同交通卡-T Money使用，由大小餐廳Cafe食飯飲咖啡、商店買衫褲護膚品、坐地鐵坐巴士、到便利店買零食，所有地方都可以順利用WowPass解決，真係簡單得嚟又方便。下面就同大家分享吓點樣申請WowPass同有咩注意地方！（我哋因為做少咗一點就搞到好麻煩）
WowPass係咩嚟？
WowPass係一張針對外國人/遊客而設嘅預付卡，類似一張Debit卡/銀行卡咁，喺唔同地方畀錢都可以透過將呢張卡完成。過程大概係你要畀錢嘅時候，就將呢張卡嘅晶片插入商店收錢嘅機度，佢就會扣咗卡入面嘅餘額咁。
WowPass可以喺咩地方使用？
而呢張卡同時亦係一張T Money交通卡，可以用嚟乘搭首爾嘅地鐵/火車/巴士等。
所以用一張WowPass就可以解決晒你絕大部份嘅畀錢需要。
點解係絕大部份呢？部份餐廳/店舖會因為消費額太低而要求你轉用現金，呢一方面就要注意一下店舖有冇類似嘅文字提示。
WowPass點樣申請？（超重要！）
今次要特登寫一篇教學係因為Raven出發去首爾之前，都有上網望過WowPass點樣申請，但係就因為網上面睇唔到以下會出現嘅問題，所以搞到成個旅行嘅開始就出現咗問題。
推介方法：旅行前下載WowPass App預先購買
當你旅行前已經下載咗WowPass App之後，可以喺App入面預先購買一個Airport Package，以14,000won，大約係HK$82。當中係包括咗WowPass嘅按金（會員費），同10,000won嘅T-Money交通費。當購買之後大家就可以喺落機後，前往機場嘅SK Telecom櫃檯領取，之後就可以利用佢去坐車到你嘅酒店，再喺首爾市入面增值張WowPass。
不推介方法：到仁川機場WowPass 售賣機辦理
當你冇事先買定WowPass，而你身上並冇任何韓won現金，亦冇一張T-Money交通卡，你抵達仁川機場之後行到地鐵站嘅時候會發現部售賣機係喺收費區入面… 你就需要行返過去入境大堂嗰度唱錢再返地鐵站坐車…
如果想喺仁川機場辦理WowPass，咁就要記得準備足夠現金買車飛入機場快綫收費區喇！
另外都提提大家首爾機場快綫直通綫雖然前往首爾嘅時間比較快，但係班次較疏，車費亦較高，建議要預約定座位。如果你本身都有足夠現金，其實可以坐普通綫前往首爾再辦理WowPass都得。
其他方法：到首爾市內嘅WowPass機器辦理
如果你冇用到上面兩個方法辦理，就可以學Raven咁，去到首爾市內嘅WowPass 售賣機辦理。
只要你帶足夠嘅港幣現金，你可以喺度將所有錢入晒落WowPass，而且匯率都算幾高，唔使特登去明洞唱錢咁嘥時間。畀大家參考下14/10/2023當日匯率，HK$5500兌換咗936,925won。
大家只要跟住部機器嘅畫面，逐步逐步大約5分鐘就可以成功開通一張WowPass：
- 1. 選擇辦理新卡、
- 2. 選擇兌換嘅貨幣、
- 3. 掃描護照、
- 4. 放入港幣現金、
- 5. 確定匯率、
- 6. 選擇提取韓won之後用嚟增值T-Money、
- 7. 成功提取現金、
- 8. 機器製作好WowPass卡片、
- 9. 將卡片再插入機器完成發行過程
WowPass教學－點增值／提款？
WowPass最方便遊客嘅好處係你只需要帶港幣去到首爾，再透過WowPass機器就可以兌換成韓won，匯率亦相當好，超方便。
當你需要現金/增值T-Money嘅時候，就可以用1000won手續費喺卡入面提取返韓won現金。
大家可以到WowPass官網睇到售賣機位置。
WowPass使用上有咩注此事項？
如果你有上網research過，應該仲會搵到WowPass以外嘅預付卡NAMANE可以選擇，不過因為WowPass嘅售賣機數量大幅多過NAMANE，無論係辦理/提款上相信會比較方便。而WowPass比起NAMANE匯率比較透明，手續費較低，以旅客嚟計係比較吸引。而NAMANE亦有佢嘅好處，就係佢可以透過App入面將預付卡嘅餘額轉移去T-Money餘額，亦可以diy NAMANE卡片外觀。
另外WowPass其中一個限制係最高只可以存入1,000,000won，如果你長期逗留喺韓國呢一點就要注意一下！
希望呢一篇WowPass教學可以解決到所有出發前嘅疑慮～
