準備去首爾旅行嘅你如果仲搵緊住宿，可以考慮下位於首爾地鐵1、3、5號線交匯嘅鐘路三街站，喺4號出口一出就到嘅Moxy Seoul Insadong！酒店勁近益善洞、距離仁寺洞都只係大約5-10分鐘內路程，出入交通勁方便！加上屬於Marriott旗下，服務設施都一應俱全，住落都比較安心！
Moxy Seoul Insadong房型介紹
今次預訂咗嘅係Superior Double Room高級雙人房，房價大約係HK$9XX/晚，視乎旅行日子有唔同。
酒店全幢16層，而我哋住嘅樓層總共有8個單位，分佈喺左右兩邊各4個單位。房間大小一啲都唔細，空間感都唔錯，就算將兩個26吋行李喼打開放喺門口/走廊位都完全唔阻礙活動。
房內都有足夠嘅設備，雪櫃、水煲、迷你夾萬等都有，而最有特色係主要牆身上有好多掛勾可以畀你掛袋、外套等，仲有一張木枱木凳掛喺度，有需要就可以拎落嚟使用。
而廁所同浴室空間分開，共用中間嘅洗水盤，空間相當足夠，沖涼時暖水都相當好，花灑水力都好夠，係幾舒服嘅。酒店使用嘅洗頭水、護髮素、沐浴露都幾香，亦唔會使用後有痕癢，應該都算係幾溫和補濕。
酒店週邊+地理位置超正！
Moxy Seoul Insadong酒店面前就係首爾其中一條韓屋村：益善洞，有唔少餐廳cafe都值得一試！酒店大堂一出就係地鐵站出口外，門口左邊就有一間E-mart便利店，益善洞入口亦有另一間便利店。
Raven整理咗一張Moxy Seoul Insadong週邊嘅景點，基本上仁寺洞同益善洞都係距離超近。而北村韓屋村、光化門、景福宮、昌德宮呢啲好啱去觀光同影相嘅都大概係30-45分鐘內嘅步行距離。如果唔想淨係用地鐵去探素首爾，不妨下載個Naver Map，跟住導航慢慢行。雖然韓國冇日本咁乾淨整理，但係秋天10月尾至11月初，以上呢啲地方都會開滿銀杏/紅葉，影相真係一流！
酒店設施都好齊全
Moxy Seoul Insadong大堂有個休息室，拍酒店門卡就可以入內；
而2樓就有Gym Room同玩樂室，每日仲可以喺2樓享用一杯免費咖啡；
B1就有洗衫房(好似係4000won洗一機4000won乾一機)，可以免費燙衫之餘，check-out當日仲可以借locker暫時寄存行李；
Check-in就需要上16樓，呢層仲有酒吧，遇啱日子仲會有music show睇，呢度係頂樓而且景觀唔錯，可以望到南山塔。
地下大堂最方便就係有WowPass售賣機，無論新開卡、唱錢、提款都可以做到。
唯一壞處係附近多餐廳
酒店地下兩邊街道都開滿餐廳同布帳馬車，所以平日會比較多人食飯，星期六日晚更加係烏煙瘴氣，成條街都係醉酒佬、餐廳垃圾膠袋…
我哋仲要好黑仔咁見到個阿伯飲醉酒隨街屙尿之後同佢個朋友揸揸手…
如果擔心安全就建議喺地鐵4號出口出入直接返酒店，如果冇呢個concern其實都可以喺其他出口步行返酒店，沿路有唔少餐廳便利店可以買嘢。
