荃灣良店: Hōmu By Favilla-色香味十足嘅日式cafe

之前同大家介紹過佢哋喺觀塘嘅分店The Artlab by Favilla，今次就去埋佢哋喺荃灣愉景新城嘅分店hōmu by favilla，少咗workshop嘅荃灣分店最主要就真係餐廳，設計簡單而且環境都幾舒服，而食物一樣都係賣相靚味道好。

hōmu by favilla 推介：慢煮封門牛柳定食

呢份慢煮封門牛柳定食其實之前喺觀塘分店已經試過一次，今次喺荃灣再食一樣都係咁正，啲牛柳好軟熟，味道都好香濃。定食跟咗一份柚子紫薯蓉，味道有少少柚子味幾清新，不過配薯蓉食落我就唔算話好鍾意。

如果你係食肉獸就可以試埋呢份春雞，啲雞肉唔會「鞋」，而且味道都唔錯！

呢度除咗唔同嘅定食、日式鍋類、漢堡、意粉呢啲主食之外，佢哋嘅咖啡都唔錯。而下午茶時間佢哋都有啲份量細啲嘅嘢食選擇，仲有日式蛋糕添。

↓撳個廣告可以支持大兄台繼續寫作↓

佢哋仲會有節日推出嘅產品，亦有搞花藝嘅興趣班，大家可以Follow Favilla Cafe 嘅 Facebook 同埋留意佢哋嘅官網。