轉會用iphone11半年，原本都一直用緊有線耳機聽歌，但係武漢肺炎搞到大家除咗星期六日之外嘅日子都要戴口罩，坐車嘅時候又戴口罩又戴耳機仲要戴埋眼鏡真係好唔方便，所以研究咗一輪決定買日本得獎真藍芽耳機 Nuarl N6 pro，購買方法喺文末分享。
Nuarl N6 pro 開箱
撕開透明包裝紙，Nuarl N6 pro嘅包裝盒一推，就可以見到內層嘅耳機同其他附件。耳機充電盒係好滑嘅磨砂面，質感唔錯，除咗跟機有3套原裝嘅黑色耳塞，仲會有3套SpinFit耳塞，除此之外有耳機兩隻，Type-C充電線，說明書等等。而N6 pro耳機望落個大細其實偏大，但係真實戴上耳機，畀耳仔包圍住反而覺得大細適中，唔會明顯突出耳仔外。而充電盒同耳機係有磁石吸附嘅優點，唔需要擔心打開充電盒會跌咗耳機出嚟，就算反轉拎都唔會跌。
連線穩定度
官方資料：
－使用Qualcomm QCC3020藍芽晶片
－TrueWireless Sterero Plus技術讓左右耳機可獨立連接到智能手機，左右耳機之間的通信消失後，有效增加訊號傳輸的穩定性，連接更不容易斷開，進一步延長連續播放時間
－主機副機交替功能，讓電量夠高的耳機作為主機，電量較少的會成為副機，而整個過程會在打開充電盒拿出耳機那一刻已經完成
初初買真藍芽耳機其中一個concern係擔心會唔會成日斷線，不過買咗N6 pro之後用咗大概2星期，就算坐巴士、過馬路、穿過商場呢啲人多嘅環境，都極少有連線問題，聲音連接好穩定。暫時遇過耳機斷線都係唔夠半秒嘅時間就會連線番，感覺係留意到首歌窒一下就已經連線番。
使用感受
耳機連線相當快，由打開充電盒戴起其中一邊耳機時，夠快嘅話會聽到Power On，再戴埋另一邊耳機就已經成功連線。而且左右兩邊耳機嘅按鍵配置完全一樣，好容易記熟使用方法，就算一隻手唔方便都可以用相同方法咁操作另一邊耳機。另外要提一提，最好兩邊耳機都分別同手機做一次配對，咁就可以淨係拎一邊耳機出嚟用，而另一隻耳機就可以留番喺充電盒。
Raven配戴耳機有使用跟機嘅耳翼，感覺都好舒服，不過畀女朋友試過，可能佢耳窩較細，所以覺得拆除耳翼會戴得比較舒服，不過就算咁都唔會有鬆動嘅感覺。建議大家買完可以試吓需唔需要使用耳翼。另外，耳機有IPX4防水，所以普通運動流汗，落雨撇到都唔需要太擔心。
跟機原廠提供嘅耳塞Raven係並冇使用過嘅，因為SpinFit耳塞可以更加深入耳道，相信對音樂品質同隔音效果都更好。而初初聽嘅時候，SpinFit因為都真係好深入耳道，搖晃個頭可能會令耳塞插得太入會覺得敏感，習慣咗就唔會有呢個問題。而長期聽歌，感覺都好舒服，唔會話耳仔受到壓力。
音色分享
官方資料：
－最高等級釹磁鐵6mm動圈式全音域喇叭
－耳機使用單壁式納米碳管(Single Wall Carbon Nanotube)和PEEK(Polyetheretherketone)兩張振動模板合成的「SWCNT複合振動板」
－專利技術「HDSS」重現自然清晰音質和寬廣聲場感
人話：Raven認為Nuarl N6 pro嘅高中低頻相對平衡，聽男女聲感覺好細緻，聆聽樂器較多嘅歌曲，可以清楚聽到不同樂器嘅聲音，尤其聽木結他為主樂器嘅歌曲特別舒服，結他弦震動嘅聲音，「痴flat」時嘅瑕疵帶來嘅高音都唔會感覺刺身。聆聽低音較多的搖滾歌曲時，節奏感不錯，但略嫌極多樂器的情況下，低音聽落會有一啲朦。而空間感唔會有震撼嘅感覺，聽落會係平淡啲。另外，因為耳機係被動隔音，可能會有唔少人因此卻步，不過配合Spinfit耳塞比較深入耳道嘅作用，平時經過繁忙嘅馬路，音量大概設定做60-70%，基本已經唔會好聽到出面嘅噪音。加上考慮安全，Raven平時都只係聽50%音量大小，外界嘅噪音已經好細。
電池耐用度
Nuarl N6 pro嘅官方資料指耳機可以連續使用超過11小時，而聆聽aptX音效就可以使用8小時，充電盒總共可以提供55小時使用時間，耳機冇電嘅情況下放入充電盒充電15分鐘就可以提供約2小時播放時間，而充滿電嘅充電盒可以為完全沒電嘅耳機充電約4次。個人使用接近兩周時間，每日大概聆聽差唔多2小時音樂，之後就放番充電盒中，仍然無需要為充電盒充電，電量顯示為尚餘50-75%電力，感覺超有力。
延遲度測試
喺延遲度方面，發現睇Youtube同Netflix唔會有延遲嘅感覺，對咀程度好高。為咗測試耳機效能，襯最近Cytus II限免所以用來極限挑戰一下Nuarl N6 pro嘅延遲度，喺玩呢種對聲音延遲高要求嘅節奏遊戲，好容易留意到按下音符到音效回饋出現嘅時間略慢半秒，感覺係睇到音符後，反應到按下去後鬆開手音效才會反應出來，如果用嚟玩這種對音效十分敏感嘅遊戲時都係唔太建議大家使用無線耳機。
購買方法
Raven在留意到Nuarl N6 pro後有到price.com.hk格價，但價錢偏高，大概around HKD$1500。之後經過一番搜尋後，搵到一間有實體店嘅網店，鋪頭位於屯門華都商場一樓，價錢只係$1288，亦都係行貨，提供一年保養。有興趣買嘅可以點擊下面連結購買，而且係有送貨/店取揀。
購買連結：https://www.phoneshowstore.hk/products/nuarl-n6-pro
