身為用咗多年Android用戶嘅我喺兩年前決定轉會去Apple，所以同女朋友一齊去咗買iPhone 11。喺Apple Store買嗰陣，藍精靈介紹咗AppleCare+呢個服務，雖然要畀多幾百蚊，但係就多兩年嘅人為意外損壞可以平價維修，同有兩次完全損毀情況下可以補錢換機，所以當時我哋一齊買咗。而兩年後，喺就快推出iPhone 13之前，一齊去咗Apple Store補$788換咗兩部新嘅iPhone 11，下面再同大家分享下成個過程。
AppleCare +前兩部電話嘅情況?
首先同大家分享番Raven同女朋友兩部iPhone 11換機前嘅狀況先：
我嗰部電話因為一直都有用玻璃保護貼，但係就好少戴手機殼，兩年入面都幾經常跌電話，可幸嘅係部電話都幾襟跌，個螢幕一直都冇跌爆過，只係保護貼經常爆要經常去買新。機背我就一直貼住咗dbrand嘅貼紙，所以都好少理佢咩狀況。另外因為經常跌電話，所以外框嘅鋁金屬都有唔少位置甩漆同跌凹咗。
Natalie之前部iPhone最主要因為電池健康度喺22個月嘅使用入面已經跌到落去76%，加上平時電話就算戴住手機殼，個鏡頭邊框都已經花晒。
點樣用Apple Care +?
就係因為上面提到嘅情況，加上今年9月就到期嘅大前提下，我哋早幾個星期就Download咗Apple Support呢個App，之後喺入面登記要安排維修，Book好晒時間之後按番時間去到Apple Store充可以開始維修保養。由於我哋Book同一日同一地點同一時間，所以我哋同一張枱就有兩個Genius負責我哋嘅Case。分別講咗我哋電話嘅情況之後，Genius知道我哋有買到AppleCare+，就簡單幫部電話做個簡單test，之後問番我哋有冇Backup到原機資料。解釋一輪之後，佢哋就喺倉入面拎咗兩盒電話出嚟。初時我都有諗過佢哋係咪可以做到更換電池/更換手機邊框，最後都係直接換機。
而換嘅新電話包裝盒唔係零售版本，係一個薄身紙盒裝住，因為當時冇其他電話喺手又唔記得拎相機出嚟影低…紙盒入面就係一部有包住膠嘅iPhone 11。咁喺簡單檢查番機身有冇花痕之後，就可以登入番自己嘅Apple ID做Restore，而舊機就需要自己手動熄Find My iPhone，同埋登出Apple ID，最後再撳埋Reset iPhone。
換好新機之後，我哋每人都係畀番$788就完成晒個過程。成個流程其實都幾快，如果經常跌電話嘅朋友係可以考慮一下，始終兩年時間要跌爆兩部電話都唔算難。如果你寧願畀錢出面細鋪換螢幕，不如畀$228換螢幕，或者畀$788換一部新機。
iPhone要找去Apple Care+前有咩需要注意?
由於有好多銀行App個保安編碼都係綁定咗電話，所以Backup舊電話未必一定Work，要視乎你用嘅手機銀行設定。
如果事前冇Backup到部電話，其實可以同Genius講，睇佢可唔可以安排幫你將舊電話嘅資料抄入新電話度先。咁你就需要簽一啲文件證明你將部機同資料交咗畀Apple咁，之後就要睇番你電話入面有幾多資料需要過，如多時間就越耐。當日女朋友部機就放低咗大概90分鐘就完成可以拎番，而佢用嘅係iPhone 11 128GB。
Telegram因為所有對話都Save喺Sever度，所以唔需要擔心冇晒所有對話。但係Signal就冇得簡單Backup，你需要完整Backup部iPhone去保留所有維修前嘅對話，或者係同時有兩部電話喺手上去做轉換設備。如果唔係之後你就唔會睇得番之前嘅所有對話。
所有App嘅登入如果你冇Save入iCloud Key Chain或者抄低，到你拎番新手機好有可能要不停撞番啲密碼。
所以最重要一定係先做Bakcup! Backup! Backup!
你可以Backup去iCloud，又可以用PC/MAC去備份iPhone。
最後換咗部係新機定翻新機?
初時換咗新機之後，我都有上網望下究竟AppleCare+換嘅係咩機。大家都可以試下開iPhone嘅Setting->General->About入面望下Model Numer係咩。最後發現我手上嘅係M字頭，女朋友手上嘅就係N字頭，如果跟據網上面嘅資料，即係一部係原廠新機，一部係官方換機。當然上面寫嘅準唔準就唔係好清楚，但相信就一定唔係翻新機。
因為AppleCare +嘅價錢每年都會更改，建議大家可以上番Apple官網睇番詳細嘅資料。
