之前同大家分享過買咗部Sony Xperia 10 III，Android系統比起iPhone真係多啲唔同嘢玩，網上面可以搵到好多實用而且開源嘅App下載，今次同大家分享一下用Android手機睇漫畫一定要裝嘅漫畫app: Tachiyomi，呢個App不但可以畀你透過安裝唔同嘅Plugins嚟搵到全世界嘅漫畫source之外，用戶仲可以自訂閱讀漫畫嘅介面同手勢，好多嘢都可以自己揀，下面再同大家逐一介紹。
多個中英文漫畫Source
用戶第一次打開Tachiyomi嘅時候需要去畫面下方嘅「探索」，導入自己嘅漫畫，又或者可以去擴充套件嘅頁面入面搵一下唔同嘅漫畫Source，但係由於每個Source都係獨立一個Plugins，要安裝之後先知入面嘅內容，用戶就要自己試下喇。而安裝之後喺探索入面可以揀番已安裝嘅Plugins去睇入面嘅內容，或者直接去探宗頁面頂部嘅放大鏡去搜尋指定嘅漫畫，如果已安裝嘅Plugins入面有呢本漫畫，就會顯示出嚟。
自訂漫畫分類
如果收藏咗好多唔同類型嘅漫畫，想整理都可以透過開設唔同嘅「分類」嚟管理。喺Tachiyomi主畫面嘅右下方有「其他」，入面有一個「分類」嘅設定，入面可以新增唔同嘅分類，例如「運動」、「戰爭」等等。之後只要喺「書櫃」頁面長撳漫畫，就可以選擇最左嘅「選擇分類」，放入指定分類入面。
多種個人化設定
Tachiyomi提供多種個人化設定畀用戶可以喺睇漫畫嘅時候改變揭頁方式、螢幕色彩/亮度、背景顏色、Dark Mode等，而揭頁方式好值得一提，普遍嘅漫畫App都係提供左右揭頁，而Tachiyomi就可以揀Webtoon方式揭頁，即係下一頁內容會自動連住上一頁嘅底部顯示，所以實際使用同體驗會更加似上網，唔洗左右不停掃上一頁/下一頁。
↓撳個廣告可以支持大兄台繼續寫作↓
下載Tachiyomi 漫畫App
其他實用App推介: Datatone (iPhone App)