一副音質好，通話質素高，網上評價超越Apple Airpod pro嘅真藍芽耳機，你覺得要用幾錢先買到？今次介紹嘅係Raven女朋友買嘅Anker Soundcore Liberty Air 2，官方定價都只係HK$899，即刻睇吓耳機嘅開箱評測啦！
包裝及耳機
Anker呢個品牌本身係一個專門出手機配件，例如尿袋（外國充電器）、手機充電線等等。而今次推出真無線耳機，喺包裝同配件上都冇慳皮，一次送上5個尺寸耳塞，總有一款可以適合用家嘅耳窩。而充電線上都印有Anker字樣，可以話係驗明正身。用戶需要將左、右耳兩隻耳機取出，再放入充電盒，就可以開始充電。
Liberty Air 2 音質及聽感
Raven同女朋友都認為Soundcore Liberty 2 Air係一款強調中高頻嘅耳機，分析度唔錯，人聲亦靠前，好適合長時間聆聽。喺聆聽一啲弦樂器為主嘅流行曲可以容易分辨到弦線震動嘅聲音，高頻亦唔會有刺耳感覺。加上專用apps有唔同嘅預設調音，亦有HearID同自定EQ畀用家調節，所以音質可以話唔難滿足大部分人。唯一可能令部分人卻步係耳機嘅低頻相對較弱，聽一啲鼓聲或者重低音樂器，會有種清脆嘅感覺，冇咗一種震憾嘅感覺。
舒適度及電量
Soundcore Liberty Air 2造型類似傳統入耳式耳機/Apple Airpod，唔會對耳仔造成壓力，而且耳塞都可以穩定固定喺耳窩，所以唔洗太擔心日常使用會跌出嚟，不過做運動嘅時候如果出汗，濕滑表面仲可唔可以咁穩定就唔肯定。
電量方面比之前Raven買嘅Nuarl N6 Pro 耳機電量同充電盒電量都細，但係單次充電都可以連續使用7小時，而急用時只要充電10分鐘就可以得到2小時使用時間。
而充電除咗可以用USB Type-C線之外，Liberty Air 2係支援Qi無線充電㗎，用手機無線充電板完全冇問題。
延遲度及連線
以平日聽歌同睇Youtube同Netflix，都唔會覺得有delay。而耳機支援單耳使用，但限制只能夠用右耳，各位需要留意一下。不過日常使用，坐巴士過隧道，過馬路或者喺人多嘅地方都冇出現斷線問題，女朋友表示只係出現過窒一下就順番。
專用Apps功能介紹
下面會介紹一吓Anker推出嘅Soundcore App，而本app功能眾多所以Raven只會介紹幾個比較重要嘅功能。
自行設定按鍵功能
Soundcore app其中一個實用功能，係可以畀用戶自己設定左右耳嘅按鍵，例如短按左耳預設為播下一首歌曲，用戶可以將佢改為增加音量。
Hear ID專屬EQ功能
EQ部份分為Hear ID同3大類EQ：自定EQ、專業音樂人s設定嘅EQ、Soundcore自已調音嘅設定s。
下載Android版Soundcore app：連結
下載iOS版Soundcore app：連結
總結
如果你考慮緊買真無線藍牙耳機，預算係港幣＄1000樓下，其實Anker Soundcore Liberty Air 2好適合大家，音質上相信可以滿足到絕大部份用戶，而耳機唔同嘅功能都令到Liberty Air 2超越同級或者更高價錢嘅真藍牙無線耳機。但係如果你同Raven一樣唔鍾意耳機有支柄柄伸出嚟，可以睇吓 日本靚聲真藍芽耳機Nuarl N6 pro評測分享 ，希望呢篇分享可以幫到大家。Byebye~
