又到每年一次同大家捱夜睇Apple2023秋季發佈會，今年嘅主角係用上鈦金屬嘅iPhone 15 Pro，將自定義嘅Action Button取代沿用多年嘅靜音鍵；而iPhone 15全系列終於換上OLED螢幕同USB-C接頭！另外，仲公佈咗Apple Watch Series 9、Apple Watch Ultra 2等。立即睇今年發佈會嘅產品陣容～
iPhone 15 Pro / iPhone 15 Pro Max
今次發佈會嘅主角iPhone 15 Pro同iPhone 15 Pro Max，除咗用上Grade 5 Titanium鈦合金外，Pro系列最主要得到用上3nm制程嘅A17 Pro晶片，採用6核心CPU：2 個高效核心及 4 個節能核心外，最大賣點係升級咗嘅Pro-class GPU，全新嘅架構提供足夠硬件處理Ray Tracing嘅處理效能，發佈會中提到生化危機4重製版、下一集嘅刺客信條都會直接上架App Store，可以用iPhone遊玩呢啲高質素遊戲。
機身顏色方面，由於用上鈦金屬，4款顏色（黑色鈦金屬、白色鈦金屬、藍色鈦金屬、原色鈦金屬）嘅分別並唔算好突出。價錢方面同上一次並冇分別，iPhone 15 Pro最平由128GB HK$8,599起，iPhone 15 Pro Max收起128GB版本，由256GB HK$10,199起。
相機方面，今代iPhone 15 Pro沿用iPhone 14 Pro嘅4800萬像素主鏡頭同1200萬像素廣角鏡頭。升級主角係遠攝鏡頭，當中iPhone 15 Pro Max仲提供到5倍光學變焦 / 120mm焦距。主鏡頭雖然冇大升級，不過可以透過變焦做到24mm/28mm/35mm三個相機焦距；超廣角鏡頭嘅13mm焦距；遠攝鏡頭由48mm至120mm焦距，由3個相機鏡頭組合帶嚟7個不同嘅鏡頭焦距。
↓撳個廣告可以支持大兄台繼續寫作↓
相信對用咗iPhone多年嘅用戶最大衝擊就係靜音制嘅改動，將來冇得再「啪啪啪」咁轉靜音，換嚟嘅係自定義嘅選項，變化更多，但大家應該都要啲時間去適應同學習下。
除此之外，iPhone 15 Pro更加可以拍攝Spatial video，透過Apple Vision Pro 嘅VR頭戴裝置可以睇到更清晰真實嘅畫面。
換上USB3嘅USB-C接口後，iPhone 15 Pro系列提供高達10Gb/s嘅傳輸速度(大約係1250MB/s)，更加可以直接將拍攝嘅4K60 ProRes影片直接儲存到External Storage，又或者將4800萬像素相片直接拍攝傳輸到電腦，相信以後更加方便一啲專業人士工作使用。
詳細規格請睇：Apple 官方網站
↓撳個廣告可以支持大兄台繼續寫作↓
iPhone 15 / iPhone 15 Plus
iPhone 15系列就會用上iPhone 14 Pro系列嘅A16 Bionic 晶片，螢幕亦升級做OLED顯示屏，同樣會有Dynamic Island動態島。價錢方面同上一次並冇分別，iPhone 15 最平由128GB HK$6,899起，iPhone 15 plus 128GB由 HK$7,699起。
機身顏色上比iPhone 15 Pro系列活潑年輕，總共5款顏色（黑色、藍色、綠色、黃色、粉紅色），亦都係首次做到一體式機背，鏡頭背板順滑咁連接整個機背。
相機方面，換上4800萬像素主鏡頭外，配合廣角鏡頭可以做到0.5x、1x、2x三個拍攝焦距。錄影方面可以拍到最高4K60 HDR影片。
而連接上，雖然換上USB-C接頭，不過只係支援USB2規格嘅速度。
↓撳個廣告可以支持大兄台繼續寫作↓
詳細規格請睇：Apple官方網站
iPhone 15全系列售價及預訂日期
| 型號 | iPhone 15 Pro | iPhone 15 Pro Max | iPhone 15 Plus | iPhone 15 |
|---|---|---|---|---|
| 售價 | HK$8,599起 | HK$10,199起 | HK$7,699起 | HK$6,899起 |
| 預訂日期 | 15/9晚上8時 | 15/9晚上8時 | 15/9晚上8時 | 15/9晚上8時 |
Apple Watch Series 9
最新發佈嘅Apple Watch Series 9用上S9 SiP晶片，除咗效能提升外，電量同樣可以應付長達18小時使用。今次最大特色係加入咗手勢功能，透過升級咗嘅感應器，用戶只要做出「噠手指」嘅動作，就可以做到接聽電話、繼續播放影片、相機自拍、暫停鬧鐘等等。
顏色方面，加入咗粉紅色同午夜暗色之後多達8種顏色（5款係鋁金屬，3款係金鏽鋼）。
另外螢幕亮度最高可以去到2000nits，最暗只有1nit，無論係進行戶外活動或者喺戲院睇戲，都冇問題。
不過呢個手勢唔好喺韓國男人面前做，廢事佢誤會笑緊佢。
Apple Watch Ultra 2
估唔到咁快就出第2代嘅Apple Watch Ultra 2，其實改變唔多，同上面Series 9一樣使用S9 SiP，一樣支援手勢功能外，螢幕升級到最高支援3000nits，喺烈日嘅山頂應該都可以清晰睇到畫面。
Apple Watch 系列售價及上市日期
AirPods Pro Gen 2USB-C
發佈會中有提到嚟緊AirPods Pro充電盒都會換上最新USB-C接頭，真正一條線叉晒所有device。
新版本已經可以訂購：立即購買最新AirPods Pro
Apple2023秋季發佈會後感想
今年Apple秋季發佈會嘅內容比較簡單，主要圍繞iPhone 15同Apple Watch，當中iPhone 15 Pro價錢冇加價外，竟然仲係維持原價，呢點幾令人意外；不過比較失望嘅位係5倍光學變焦鏡頭只係喺iPhone 15 Pro Max上先有，鍾意用細機嘅朋友就冇得享受… 另外，發佈會當中有唔少篇幅都有提到Apple對環保嘅重視，由包裝、製作、運送過程都希望做到減低碳足印，佢哋仲搵嚟黑人女演員Octavia Spencer做Mother Nature段片幾搞笑。今次主要係硬件上嘅發佈，時間應該比2022/2021年都短，有興趣睇返之前發佈會內容可以撳下面連結。最後，如無意外Raven今年都會由iPhone 11升級上iPhone 15 Pro，成功撳到第一水就同大家開箱分享下。
