今日凌晨係WWDC2021嘅第一日，蘋果都公佈咗好多iOS15, MacOS, iPadOS嘅updates，當中我最興奮嘅係FaceTime嘅新功能：可以將FaceTime嘅對話Share一條link畀人，Android用家可以透過瀏覽器加入個FaceTime call，而且仲可以喺入面Share畫面/音樂!擺到明係嚟挑zoom機!
FaceTime 更新：通話質素提升
嚟緊iOS15嘅FaceTime 會加入Spatial Audio，可以模擬緊用家真係喺房入面，畫面右邊嘅朋友講嘢，咁你就會聽到右邊大聲啲，空間感會比而家更好，實際效果就要等iOS15正式登場先可以試到。
另一個關聲音事嘅update係FaceTime可以幫你隔咗背景一啲雜聲，令到通話清晰啲。同一時間，如果你想分享背後一啲聲音，例如街頭音樂或者表演咁，你又可以喺音效設定度揀番分享背景聲。
最後一個會影響通話質素嘅update就係FaceTime即將加入人像模式，透過iPhone鏡頭嘅效果，自動將畫面聚焦喺用戶上，背景會自然咁模糊化。
↓撳個廣告可以支持大兄台繼續寫作↓
FaceTime 更新：跨平台設備都用到
嚟緊iPhone用家可以將FaceTime嘅視像通話，分享連結畀Android 同Windows嘅朋友，對方就可以透過瀏覽器連上Web版嘅FaceTime。而且FaceTime 仲可以排Schedule 咁開meeting，完全係針對Zoom咁。而且就算跨平台使用都係有點對點加密嘅，安全度應該足夠。
FaceTime 更新：共享喜好興趣
比起zoom呢個針對商業/教學用途嘅視像通話app，嚟緊FaceTime都可以share 用戶畫面，除此之外，仲可以分享音樂同影片。將來音樂/串流App開發者可以令FaceTime嘅分享畫面更強大！將來你可以分享Apple Music嘅歌畀朋友一齊喺FaceTime度聽，可以一齊睇Netflix咁！
而且FaceTime一直都支援嘅PiP畫中畫功能都會保留，而且就算朋友分享緊唔同畫面，你都可以繼續縮細對話畫面，做其他嘢。
今次嘅iOS15仲有好多唔同嘅updates，如果想睇更多可以上番蘋果嘅官網。雖然傳聞嘅新MacBook、iPad一樣都冇發佈到，但係諗深一層，其實蘋果都好耐冇畀過驚喜大家，今次咩都唔出都算係一個驚喜嘅。
