有人話點解唔買XBOX而買PS，因為身邊朋友都係打PS丫麻。咁點解有Android用家想轉會去iPhone？好大機會係身邊朋友都係用iPhone，次次影完相都係AirDrop，而淨低嘅你可能就要等人地whatsapp你喇…不過今日有個好消息係Android用家終於有Nearby分享功能可以用，好似AirDrop咁簡單就可以分享相片或者其他檔案畀身邊朋友；另外一個壞消息係你身邊嘅朋友用iPhone嘅話，你都等收whatsapp啦！
Google Nearby分享功能介紹
呢個功能只適用於Android 6.0以上嘅電話，如果你手上係呢一兩年買嘅應該唔需要擔心就可以輕鬆用到，不過唔同牌子需唔需要等update暫時就未知，但係Google Pixel手機如無意外已經用到。
功能運作嘅原理好簡單，A先生要share相片畀B小姐嘅時候，如果兩個人都係用Android手機嘅話，只要揀打開相簿某張相再喺分享時揀番NearBy嘅人，電話會發出藍芽訊號去搵附近有呢個功能嘅電話，只要喺畫面度揀番B小姐，B小姐電話會彈出通知，接受之後就可以將相片成功發出。
咁速度點呢，Google指電話會自動搵出最好嘅傳送方法，包括用Bluetooth、Bluetooth Low Energy、WebRTC同點對點WiFi，即係冇上網都冇問題。
↓撳個廣告可以支持大兄台繼續寫作↓
安全度方面，用家可以設定電話簿入面指定朋友先可以收發檔案，而且檔案收發嘅時候係加密嘅狀態，而且平時唔用可以隱藏自己，更加可以用匿名身份去收發檔案。
資料及圖片來源：Google
