如果想要色彩表現貼近現實，又想功能夠多，攜帶又方便嘅即影即有相機，Instax Mini 90 Neo Classic絕對係首選。雖然呢部Instax Mini 90已經推出咗好多年，但係如果講到有咩對手，相信都係同一個膽造出嚟嘅Leica Sofort同Lomography嘅相機，但係前者貴，後者重，Instax Mini 90嘅後繼機款(Instax Mini 40)都難以取代佢嘅地位。由於機身大小同重量都唔會帶嚟好大負擔，所以Raven平時每日都會放入背囊。下面會分享下使用感受，希望解答到仲考慮緊買邊部Instax即影即有相機嘅朋友。
其他即影即有相機分享：Polaroid Now使用體驗-一部好基本嘅即影即有相機
Instax Mini 90 機身介紹
上網睇番原來Mini 90已經係2016年嘅產品，但係因為相機用咗比較復古嘅設計，所以到2021年都唔會覺得外表上有大缺點。
Instax Mini 90 其中一個最實用嘅功能係擁有兩個快門掣，用家無論係想影橫度/直度嘅相片都唔會有難度，當橫度使用嘅時候，可以利用機頂嘅快門掣。
如果直度拍攝嘅時候，就可以用鏡頭隔離嘅快門掣，相當方便。而鏡頭隔離嘅快門掣同時亦係相機開關掣，外圈撥動就可以控制開關。
Instax Mini 90 背面係全部機嘅精髓，所有控制都喺晒度，下面會有詳細介紹。而機背中間位係電池倉，相機用嘅充電池需要利用跟機附送嘅外置差電器進行差電。而機背上側係菲林倉，打開可以更換相紙。
機身底部有自拍/長時間曝光時都用得著嘅腳架孔。
Instax Mini 90 相紙出口位入邊有絨布包圍，撳完快門之後，相紙會慢慢褪出。
Instax Mini 90 主要功能介紹
上圖就係相機唔同嘅功能，開機之後只會顯示屏幕左上方嘅電量，同右邊嘅剩餘相片數。如果撳咗模式掣就會顯示電量旁邊嘅其他功能選項。
派對模式：主要用喺較暗環境，會用上速度較慢嘅閃光燈速度，盡量影到室內背景
兒童模式：用嚟影速度較快嘅物體
遠景模式：用嚟影3米至無限距離嘅景物
雙重曝光：開著咗雙重曝光模式，影完第一張相之後個LOGO會閃閃下，之後再撳快門就會褪相紙
B快門：以最長10秒嘅手動控制快門速度
微距：用嚟影30-60CM距離嘅景物
亮度調節：分咗3段，分別係「光啲」、「再光啲」同「暗啲」，建議正常模式影一張之後再考慮使用。而雙重曝光下，如果景物太光就建議揀「暗啲」
自拍倒數：如果想只係下一張相係自拍，只需要撳一下自拍倒數掣，之後撳快門，閃光燈附近嘅指示燈就會長著7秒，之後再閃3秒就會完成拍攝。如果想連住自拍兩張，就撳兩下自拍倒數掣，顯示屏個Logo會有「x2」符號，跟住撳快門掣之後，第一張相個指示燈同樣係長著7秒閃3秒，而第2張相就會長著3-6秒閃3秒咁運作。
閃光燈：分咗3個模式，分別係「強制閃燈」、「紅眼消除」同「禁止閃燈」，顯示屏Logo都會有變化。
Instax Mini 90 實拍分享
Instax Mini 90 實拍 
Instax Mini 90 實拍 
Instax Mini 90 實拍
上面3張相係用Printer Scan入電腦嘅效果，質素上會差咗少少，但係顏色表現冇好大分別，可以見到Instax Mini 90嘅色彩幾接近現實。上面3張相都係用自動模式拍攝，色彩明顯帶少少冷色，對比度幾高，光色會好白，暗位就會好黑咁，但係整體睇落都幾舒服。
如果想買Instax Mini 90嘅朋友可以去格價網望下有冇鋪頭做特價，文章上架嘅時候見到價錢普遍係around HK$900。式者都可以用呢條affilate link或者下面捷徑到美國Amazon購買，大兄台就可以賺到少少佣金，多謝你嘅支持。
