唔知各位iPhone用家個Home Screen放咗邊啲Widgets出嚟呢？除咗日曆、股票價格之外，Raven一直都好想有一個App可以睇到巴士預報，咁平時番工放工等車就唔洗成日開九巴App睇廣告。今次同大家介紹嘅App係之前喺連登睇到，有巴打寫咗個App，可以睇晒巴士預報、每日熱門話題、輕鐵黨鐵預報、路面情況、每日油價等等實用資訊，最正係全部都有Widgets㗎！
多款實用Widgets隨你擺入Home Screen
Datatone 數據通提供咗幾款實用資訊嘅Widgets畀用家放入Home Screen，包括咗打工仔最想睇嘅「下次公眾假期係幾時」、人人都想睇嘅「今日網上熱門話題」、坐公共交通工具嘅「巴士/小巴/輕鐵/黨鐵班次預報」，同埋駕駛人士必睇嘅「路面情況」同「今日油價」等等。當中部份Widgets唔止得細size，仲有2格同4格嘅size。
巴士/小巴/輕鐵/黨鐵班次預報 Widgets
巴士小巴實時預報 輕鐵實時預報 黨鐵實時預報
巴士小巴實時預報支援九巴、城巴、新巴、龍運、大嶼山巴士同168條綠色小巴路線，每個Widget只可以顯示一條路線，大家需要揀番指定嘅路線同站。
輕鐵實時預報可以睇到指定車站最快到達嘅4班車，或者指定車站入面指定路線嘅班次。
黨鐵暫時支援東涌綫、屯馬綫、將軍澳綫同機場快綫。
小貼士
如果大家平時坐開幾條巴士線(番工收工都計兩條啦)，可以將幾個Widgets堆疊佢哋做一個智慧型疊放Widget (Smart Stack)，咁就可以慳番好多Home Screen位置，睇落唔會太亂，用落都係向上下掃搵番想搭嘅嗰條線預報，方便好多！
今日網上熱門話題Widgets
咁大件事一定有人講 咁大件事一定有人講
其中一個比較有趣嘅Widgets係利用咗Google Trends睇番當日最熱門嘅關鍵字搜尋，同相關嘅新聞、Instagram同YouTube內容，而且Widgets有齊細細、中、大三個size，大家可以試吓邊款啱自己啲。
Datatone 獨特玩法：自訂Widgets顏色(收費功能)
Datatone 獨特玩法：自訂Widgets顏色 (只有漸變色為收費功能) 
Datatone 獨特玩法：自訂Widgets顏色(收費功能)
呢個App仲有個唔錯嘅玩法，就係用戶可以自訂3款交通工具Widgets嘅款式，由Widegst背景顏色到文字顏色都可以自訂，仲可以幫widget換背景圖，超抵讚！如果想背景顏色玩漸變色就需要訂閱佢哋嘅服務，月費只係HK$8，課咗金仲可以去廣告添。
其他實用功能：各類開放統計圖表
除咗以上嘅功能，App入面仲有一頁統計圖表，可以睇到醫療、金融、安全、人口、消費等開放資料嘅圖表。有興趣嘅朋友可以開嚟望望銀行同業拆息、機場出入境入數、急症室人數等等實用資訊。
Datatone 數據通 安唔安全？
今次Raven主要睇咗App喺iPhone設定入面要求咩資料，同埋上咗數據通官網睇佢個私隱條款：
喺iPhone設定入面，App只要求「定位」同「Siri」兩樣權限，當中就算唔開放「定位」，幾款Widget都一樣Work完全冇問題，只係打開App要睇附近交通工具路線先需要再決定畀唔畀權限都得。
官網嘅私隱條款入面寫，開發者係「Thousand & One」，App只會收集無法辨識用戶嘅非個人數據，例如只會收集你所在嘅地區、iPhone嘅型號/iOS版本等。App亦唔會收集/儲存用戶現時地點資訊。以上收集到嘅資料都會用喺資料分析同統計方面用。
基本上開發者都唔會收集過多用戶資料，各位可以放心下載。
lihkg原post：https://lihkg.com/thread/2554695/page/1
官網：https://datatone.hk/
Instagram：https://www.instagram.com/datatonehk/
Facebook：https://www.facebook.com/datatonehk
常見問題：https://datatone.hk/zh/faq