唔知各位iPhone嘅讀者將手機更新咗上iOS14未呢？呢一代嘅大更新，相信最值得討論嘅其中一樣改變就係Widgets大改版，又可以放出去主介面使用。點樣先可以活用呢個功能？今次就介紹一款記事App畀大家，除咗可以將一啲每日要做嘅嘢記低，仲可以將Widget放出主介面，咁樣就一定提醒到自己要做嘅嘢，冇藉口話唔記得啦！
經典Memo紙出嘅App：Post-it
過去一年，唔知大家係咪多咗寫字呢？原來大家由細用到大嘅Memo紙都有出手機App，透過iOS14帶嚟嘅新改變，傳統嘅Memo紙都貼入iPhone主介面。
第一次打開Post-it! App會見到啲教學Memo紙，示範唔同嘅展示方法，如果想新加一張Memo紙，只需要撳下面嘅「+」制。
揀選新增Memo紙之後會進入以上畫面，用戶可以揀唔同嘅筆寫字，如果唔想畀人睇到自己嘅字唔靚，App入面都可以畀用戶揀手寫字轉為電腦字。
作為大家由細用到大嘅Memo紙，Post-it! App都提供咗超多顏色嘅Memo紙底色畀用戶，每日變色都仲得。
喺App入面都可以揀張Memo紙係四方形定長方形，不過Widget顯示就唔會顯示到長方形，所以可以照用番正方形先。
點放Memo紙落主介面？Post-it Widget顯示方式
大家寫完自己嘅Memo紙就梗係要放出嚟提醒自己啦！記得將寫完嘅Memo紙加入最愛，之後喺Widget度先可以揀番嚟用。Widget只係得4個顯示方式，分別係1小張、1大張、小張s(一行顯示多張)、大張s(4X4大格顯示多張)。下面會放幾張示範，你都可以隨便貼屬於你嘅iPhone嘅連儂牆。
3x 1小張 
小張s 
1大張 
大張s
最後提提大家點樣可以用細張Memo Widget顯示唔同嘅Memo紙：
1) 放1個小版/大版Memo Widget入主介面
2) 長撳Widget揀選編輯Widget
3) 之後就可以揀番自己想顯示嘅Memo紙
