早喺2020年3月Moov就已經推出試用服務，不過當時只有CSL/1O1O用戶可以試用，而今日Moov終於將服務推廣到所有用戶，而且新嘅收費表都推出咗！如果你係享受高質素嘅串流音樂，又或者係Moov用戶，就立即睇吓呢個價錢引唔引到你升級啦！
Moov 24bit收費
Moov 24bit服務收費主要分做年費、月費(自動續)、月費(單次)：一次訂閱一年服務$698，平均每月$58，比起每月自動續約嘅$68平$10蚊。
Moov 16bit收費
睇完收費表可以睇到Moov 16bit冇加價，所以原本已經訂閱緊Moov嘅用戶冇咩影響。
Moov 24bit 值唔值得升級？
用戶每月畀多少少錢換嚟嘅係啲咩呢？Moov 24bit 服務係全港最大嘅 24bit 無損音樂平台，可能有唔少聽無損歌嘅朋友會用Tidal，但係Moov使用上比較簡單，普通用家會更易上手，而且中文歌庫相信較大，適合聽中文歌嘅朋友。
音質係咪真係好咗？
Raven本身用iPhone 11配兩個比較平價嘅耳機嚟聽，包括真無線藍芽耳機Nuarl N6 Pro同3.5mm耳機Sennheiser IE 40 PRO，其實喺好多歌都聽得出分別，例如聲音更加清晰，高低音變化更加柔順。
如果閣下用嘅係高級啲嘅DAP，好似Sony/Onkyo/Hiby呢啲品牌推出嘅Android音樂播放器，都支援安裝Moov app，又或者本身已經預載咗Moov app，配上更高級嘅耳機，相信音質都會更好。
而家就即刻升級Moov 24bit？
Raven認為可以再觀望一下歌庫嘅提升，雖然Moov本身好多歌曲已經係16bit，而24bit嘅歌曲就慢慢增加緊，當中有唔少24bit歌曲係由升頻技術轉換又嚟，歌庫暫時都唔算好完善，如果貪新鮮嘅你當然可以即刻訂閱啦，但係如果你好介意24bit歌庫，就可以試用一個月先再考慮之後會唔會繼續訂閱。
其實Moov比其他音樂串流服務唔同嘅係佢最主打都係香港音樂，而且訂閱之後可以任睇Moov多個演唱會，而且新歌都跟得好貼，大家可以留意吓！
資料來源：Moov
