記得2年前買咗部Polaroid One Step 2即影即有相機，部機成日都卡相紙，就算相機差滿電都用得唔放心，驚撳一次快門就冇咗一包相紙，所以都開始冇再拎出嚟用。但係上個月上Amazon見到咁啱Star Wars特別版嘅Polaroid Now減價唔洗HK$600就即刻買咗番嚟，到而家影咗兩包i-Type相紙感覺都幾好，相紙都好正常咁褪出嚟，而且呢部比起其他同廠機款多咗自動對焦鏡頭，可以因應正常拍攝或者自拍，自動切換人像/標準鏡頭，減少相片「鬆郁朦」。
其他即影即有相機分享：Instax Mini 90使用體驗-推出多年仍然係功能最全面即影即有相機
Polaroid Now 機身介紹
Polaroid Now雖然係上年嘅產品，比起今年推出嘅Polaroid Go舊，但係因為Polaroid Now依然係用正常Size嘅i-Type 相紙/600系相紙，所以機身較大亦更加好揸手，如果想細想方便，Raven會建議買Instax Mini 90都唔買Polaroid Go，之後會分享埋Instax Mini 90嘅使用體驗畀大家。
機身正面可以見到鏡頭位於正中間，觀景窗就係左邊較上位置，所以我平時影相都好少透過觀景窗去取景度位，都係盡量將相機放喺景物中間位置，直接撳快門。
喺機身背後右上方就有其他重要控制相機嘅掣，包括相機On/Off、閃光燈On/Off、同相片指示燈。下面會教番大家點樣影相唔開閃光燈、自拍、雙重曝光。
Polaroid Now 左側面係開關相紙倉嘅掣，記得唔好未影曬就開倉呀！
Polaroid Now 右側面係差電位，可惜佢仲係用Micro-USB，如果係跟番上潮流用USB-C就好喇！而差電位上面係電量顯示燈。
Polaroid Now主要使用技巧
第一次買Polaroid即影即有嘅朋友記得買之前，或者買之後記得睇晒說明書一次，同埋上Polaroid YouTube Channel睇相關教學，因為佢哋好少完整咁放晒落一個地方…
1.可以用咩相紙？買度買最平？
同好多Polaroid i-Type相機一樣，Polaroid Now係支援唔同包裝嘅i-Type相紙，有彩色/黑白色相紙，亦有唔同顏色外框相紙。另外亦都支援600系列相紙，不過比起i-Type相紙有8張，600系列相紙一包只有6張，所以建議買i-Type相紙較抵。
我最近嘅相紙都係喺一間觀塘嘅鋪頭djslifestyle買，佢哋都有Online Shop有送貨，可以撳呢條Link睇下。如果唔係，我之前都喺旺角星際嘅相機鋪買過，價錢可以參考Price.com.hk
2.閃光燈點開點熄？
由於開機之後預設係會打開閃光燈，如果要停用閃光燈，就要撳一下閃光燈掣，嚟緊嗰下快門就會跳過閃光燈，之後相機會自動開番閃光燈。如果想持續唔用閃光燈嘅話，開機之後，連撳兩下閃光燈掣。如果停用完要開番閃光燈，就撳一下閃光燈掣。
3.點樣用自拍倒數？
開機之後，撳一下機身正面嘅自拍倒數掣，倒數顯示燈會著橙色燈，之後就可以撳快門掣，倒數時間全長9秒，應該都足夠大家走位。記得！記得！記得！想取消自拍，撳番一下個倒數掣。
如果想自拍唔開閃光燈，就先撳一下自拍倒數掣，見到橙色燈著左之後再撳一下閃光燈掣就可以。
4.點用雙重曝光？
開機之後，連撳兩下自拍倒數掣就會進入雙重曝光模式，喺機背嘅相片數指示燈會閃下閃下咁顯示1字，撳咗一次快門之後，指不燈就會閃下閃下咁顯示2字，再撳快門之後，一張雙重曝光嘅相就會褪出嚟。
5.相片數指示燈仲識顯示啲咩？
上面張圖係喺Polaroid官網搵嘅，可以參考下。
6.點先知道相機夠唔夠電？
喺Micro-USB差電位上面有一粒顯示燈，開機之後如果係綠燈就代表有足夠電量，如果係橙燈就係應該足夠一包相紙，如果係紅燈就記得拎去差電先好影相喇。
7.點樣保存未開相紙？
呢個相信好多人都冇留意，甚至知道都唔敢做。其實每包相紙個包裝都有寫到，係建議放入雪櫃保存。
8.點樣清潔Polaroid Now？
如果你發現相紙褪出嚟之後，相片入面有啲痕，或者顏色唔均勻，咁影完呢包相紙之後就需要去做一次清潔滾輪。官方建議影2-3包相紙之後就清潔一次。大家可以準備好似眼鏡布/棉花棒呢啲比較軟嘅清理工具，之後打開相片倉，轉動黑色齒輪可以令到滾輪轉動，慢慢輕力抹支滾輪就可以喇。(官方話就算相機入面有相紙都可以照打開相片倉做清潔，不過為咗安全，都係建議每影一包就抹一次，確保未用嘅相紙唔會曝光到最好)
Polaroid Now實拍分享
相信會考慮買Polaroid即影即有相機嘅朋友都係畀相紙Size吸引，相紙顏色表現都係其次。其實由Polaroid One Step 2用到Polaroid Now，如果天氣正常，相片都會夠清夠Sharp。好似上面3張相片咁，顏色偏暖，對白度唔會好勁，有啲暗位仲有detail嘅。如果以為相紙大張啲，鏡頭影嘅嘢就會廣角啲，呢個諗法係唔啱嘅，因為比起我另一部Instax Mini 90，Polaroid Now嘅鏡頭嘅角度係稍為窄少少嘅。不過，相紙大嘅好處係畫面真係大咗好多！
