六樓後座冰室：好似穿越左番去80年代
Raven今次上網搵到一間舊式公屋茶樓設計裝潢嘅茶餐廳：六樓後座冰室。位置嚟講其實就喺淘大花園再行多10分鐘就會搵到個商場。咁間餐廳位置都算係商場比較入嘅位置，所以沿路行入去都要行多幾步喇！ 初頭以為只係間茶餐廳裝修特別啲，一路由商場外面行過去，先發現原來連個商場設定同裝潢都係擺到明懷舊。 六樓後座冰室個水吧位，佢天花特登油上嗰種綠綠藍藍嘅色，十足十石板街會見到嘅茶檔。 餐廳門口擺左啲枱櫈，幾似72家房客年代嘅擺設。 如果想撥個輪去叫外賣，唔好意思，呢部電話冇插電話線嘅... 舊鐵閘舊信箱，扮得都似模似樣架！ 舊式旅行喼上面再放左舊電視機同打字機，好似番番去細個嘅時候咁。 唔知呢款鬧鐘仲有冇人用呢，咁樣響法真係成屋人都俾佢嘈醒埋。 望番入餐廳，食客坐嘅枱櫈都似舊樓樓，圓枱木櫈。正中間嗰面主題牆係全間茶餐廳嘅靈魂！佢扮緊由室內望出窗見到香港舊屋村：南山村！頓時覺得自己係坐喺2樓。 講番今次食左啲咩先，其實周末lunch時間去，人流唔多，行到就可以直接入去坐低喇。同行三個人分別叫左三個唔同嘅食物，一係福建炒飯，二係陳皮鴨腿湯飯，三係雞扒腸仔鮮茄撈丁。 呢碟福建炒飯幾足料，蝦同魷魚都唔少，份量都幾足。另外有切左丁嘅翠玉瓜同紅蘿蔔增加口感。味道方面，同行朋友話味道都幾好咁。 Raven自己叫左嚟食嘅係鴨腿湯飯，佢飯同鴨腿湯本身分開上，咁食嘅時候逐啲飯咁放入去個湯度食都得嘅。個湯入面除左鴨腿，仲有蘿蔔、紅蘿蔔、冬菇、陳皮同芫茜。味道方面個湯聞落幾香，有陳皮同芫茜香味，咁食落口所有配料都夠味道，蘿蔔仲好入味。鴨腿嘅肉質都好淋。不過有樣野，食食下就會發覺呢一個湯一定落左味精，因為越食就越口乾，食完離開埋餐廳都持續口乾左一段時間...…
