iOS14.3登場！App Store終於可以睇到App私隱資料
各位iPhone用家又可以update新iOS喇！今次iOS14.3嘅更新足足有600幾MB咁大(由iOS14.2升級至iOS14.3)，所以預計更新加入或者修復嘅功能都唔少。其中對iPhone12 Pro同iPhone12 Pro Max嘅用家嚟講，最重要當然係加入Apple ProRAW相片功能啦。但係對所有iPhone用家嚟講，最重要嘅功能一定係App Store加入咗「私隱」資料，大家以後可以睇清楚每個App會點利用你嘅資料，下載App之前睇清楚咁先可以「安心使用」㗎嘛！ App Store有咩私隱資料睇？ 由今日開始，每一個App更新之後都必須加入App私隱資料，咁究竟有冇得保障到用戶私隱呢？睇番啲文字說明，其實每一個App嘅點用私隱都係由App開發者輸入，Apple未必會驗證，所以下載App之前都要相信呢個開發者先好下載。下面畀啲Cap圖大家睇吓究竟有咩睇到啦！ 以Surfshark作為例子，大家只要去到App介紹頁面，向下掃就會見到新增咗App私隱區，可以簡單見到App開發者收集用戶咩資料，只要撳入去就可以更清楚睇到相關嘅資料係咩，好似下面咁： 呢度可以睇到所有資料包括咗啲咩，以Surfshark為例以上佢用到嘅資料都唔會連結到用戶身上，除咗登入或者聯絡用到用戶電郵，其他都係匿名資料。 下面我哋睇吓唔同App究竟會有咩私隱資料睇到先！…
