Telegram更新:所有對話都可以自動銷毀訊息-仲有多個實用update

Telegram更新所有對話都可以自動銷毀訊息-仲有多個實用update

話說Whatsapp喺嚟緊5月,就會將唔接受新服務條款嘅用戶帳號逐步刪除,你開始咗用Signal或者Telegram未呀?尋日Telegram更新咗最新版本,當中有幾個更新相當實用,例如自動銷毀訊息嘅功能而家可以用喺所有對話入面,唔再限於Secret Chat;Groups同Channels嘅邀請連結而家可以設定限時/限量使用,咁就唔怕條連結畀人濫用;邀請方法除咗以前嘅Link之外,而家可以用QR-Code。下面再用官方資料詳細講下:

↓撳個廣告可以支持大兄台繼續寫作↓

其他Telegram內容:已經冇理由留喺Whatsapp!Telegram支援匯入Whatsapp對話紀錄

1.自動銷毀訊息功能

相信好多人都因為Secret Chats可以設定自動銷毀訊息而用緊Telegram,亦都有人批評只有Secret Chats先有得用呢個功能。今次嘅更新,大家可以喺所有形式嘅對話入面設定番自動銷毀訊息嘅時間,可以揀番訊息喺發出24小時 (1 Day)或者7日 (1 Week)後自動喺對話雙方刪除訊息。

重要:啟動咗自動銷毀訊息功能之後發出嘅訊息先會自動銷毀,啟動功能之前嘅訊息係唔會受影響嘅。

重要:同Secret Chats嘅自動銷毀有些少分別,Secret Chats嘅自動銷毀功能係當訊息喺對方read咗之後計時,但係個人對話/Group Chats/Channels都係以Send嗰刻開始計。

重要:Group Chats同Channel只有Admin可以開啟呢個功能

重要:啟動咗呢個功能之後,長撳對話入面嘅訊息可以睇到個訊息剩番幾耐時間自動銷毀

點樣啟動Telegram自動銷毀訊息功能?

Android用戶:撳⋮  > 撳Clear History (清除對話內容) > 揀1 Day / 1 Week
iPhone用戶:喺一個對話入面長撳一個訊息 > 喺彈出嘅選單入面揀Select > 撳畫面左上角嘅Clear Chat > 揀Enable Auto-Delete > 揀1 Day / 1 Week

啟動Telegram自動銷毀訊息功能

2.Telegram邀請連結可設定限時限量

有時Groups同Channels嘅邀請連結Share咗出去怕畀人亂咁Share,今次更新之後Owner同Admin可以設定條邀請連結有效期係幾耐,同埋有效使用次數係幾多,兩個限制一齊用都得。

Telegram邀請連結可設定限時限量

3.Telegram可以用QR-Code邀請加入

除咗傳統Share連結畀朋友之外,如果你係資訊型/鋪頭/嘅Channels、印喺卡片用嚟畀人加Contact,而家可以用Telegram App入面製作番QR-Code嚟畀人Scan加入。

Telegram可以用QR-Code邀請

其他嘅更新可以入嚟Telegram嘅update度睇:Link

圖片來源:Telegram

↓撳個廣告可以支持大兄台繼續寫作↓