Xperia 10 III 入手半年後使用感想 (萬能後備機)

Xperia 10 III 入手半年後使用感想 (萬能後備機)
Source: Sony HK

唔經唔覺買咗Xperia 10 III已經半年,呢半年一直都係當佢係後備機用,作為一部稱職嘅後備機要有咩條件呢?今次就同大家介紹呢部完全滿足到日常娛樂需要,外表行日系斯文形象嘅Xperia 10 III。

↓撳個廣告可以支持大兄台繼續寫作↓

效能: 唔高但足夠同時用3個Apps

講到硬件規格,Sony Xperia 10 III絕對比起同價位/更平價嘅大陸機用上比較低階嘅處理器,但係Snapdragon 690 提供到嘅效能其實好足夠日常上網、睇片、打機,只係打機唔建議開得太高特效同畫質。而突顯到呢部電話嘅效能就係佢內置嘅「多視窗模式」,同時喺21:9咁闊嘅螢幕下同時開住兩個Apps完全唔會覺得迫:

Xperia 10 III 同時打開兩個Apps
Xperia 10 III 同時打開兩個Apps

除咗可以一邊睇YouTube+Facebook外,用戶可以自由揀同時開咩Apps,操控唔算難,利用畫面側邊嘅「側面感應」控制,先揀上一半螢幕想開嘅Apps,再揀下一半螢幕想開嘅Apps (可以到電話設定->系統->手勢->側面感應 度set);或者到多工處理畫面,揀「多視窗模式切換」,呢度就會顯示3個之前用過嘅多視窗選擇。

Xperia 10 III 同時顯示三個Apps
Xperia 10 III 同時顯示三個Apps

配合埋「快顯視窗」功能,畫面最盡可以同時顯示3個Apps,呢個極限操作真係迫爆成個畫面,唔知大家又會點用盡呢個功能呢。

電量: 唔開5G都捱到2-3日

由於Raven只係將呢部電話當做後備機,所以基本所有嘢都係喺本身部iPhone 11度做,呢部就主要用嚟聽歌、睇漫畫,有時可能就要用嚟scan綠色qr code,咁粒電其實都可以捱到幾日。但如果開咗5G,基本上唔係好用都1日內見紅喇個電量。加上5G其實都唔係度度收得好,揀番4G反而慳電又夠用 (用緊CSL)。

↓撳個廣告可以支持大兄台繼續寫作↓

螢幕: 睇戲少黑邊打機睇多一大截

Xperia 10 iii 21:9螢幕 與 iPhone 11比較
Xperia 10 iii 21:9螢幕 與 iPhone 11比較

講到Sony嘅電話,相信個21:9螢幕絕對係好高辨識度,而呢個比例喺6吋嚟計,睇片嘅時候唔算好突出到個優勢,顯示畫面實際大細同6.1吋螢幕嘅iPhone 11差唔遠,係睇多咗少少畫面,但觀感唔算好大影響,反而如果玩支援到呢個比例嘅遊戲就好似用咗外掛咁。

21:9 同 16:9 嘅畫面比例分別
21:9 同 16:9 嘅畫面比例分別
遊戲畫面比較: Xperia 10 iii (下) VS iPhone 11 (上)
遊戲畫面比較: Xperia 10 iii (下) VS iPhone 11 (上)

上面係分別用iPhone 11(上) 同 Xperia 10 III (下) 玩Call of Duty: Mobile嘅比較,擁有21:9比例的確可以睇多更多畫面,打機嘅時候可能就係少少畫面影響成場戰果。而唔支援闊比例顯示嘅遊戲,一係就會縮細咗畫面,一係就會有些微放大,但唔會對遊戲性有好大影響。

但如果係用嚟睇漫畫,由於比例太修長,日本漫畫嘅比例喺呢個螢幕入面睇會變得好細張,有時要放大先睇得到啲對白…

耳機支援: 有線同無線都比iPhone好聽

之前喺度揀買邊部電話做後備機,其中一個條件就係有3.5mm耳機孔,SONY之外,另外一個比較易搵到3.5MM耳機孔嘅電話brand就係Samsung,當時決定都係揀番SONY主要係個人估計Xperia 10 III應該支援多啲藍芽Codec (LDAC, TWS+等等),貪佢有機會音質好啲。

先講用有線耳機先,雖然而家大部份人都有真無線耳機,我自己都有用開Nuarl N6 Pro,但久唔久都想用番個有線耳機Sennheiser IE 40 PRO聽歌,雖然只係啲平價耳機,但相比用iPhone要用轉插,音質的確係清啲。

↓撳個廣告可以支持大兄台繼續寫作↓

而真無線耳機喺Xperia 10 III度聽,第一下就明顯分到冇iPhone 11咁朦,感覺好唔同,而且聲音嘅延遲喺睇片嘅時候都少過iPhone。Raven自己本身冇用開AirPods所以冇得比較,但好多藍芽耳機都係配合Android機用會用得盡耳機嘅硬件功能多啲,始終Apple以藍芽Codec嚟講都仲只係支持SBC,如果有TWS+,連線又穩定啲,耳機嘅電都用得耐啲。

Android App 推介

如果鍾意睇漫畫,可以試吓Open Source嘅Android App: Tachiyomi,唔識嘅朋友可以睇番之前嘅介紹,功能強大之餘,而且簡單易用。

如果想搵嘢食嘅,就可以去Google Play Store下載懲罰Mee,一個App就睇晒有咩好食餐廳,仲有得簡單上傳食物相,唔洗好似啲舊平台又要開acc又要咁多打手。

如果鍾意玩啲舊game,就一定要裝埋幾款模擬器:可以玩PS2 嘅 AetherSX2、可以玩NDS嘅nds4droid,不過遊戲就要自己上網搵喇。

如果鍾意睇戲煲劇嘅,就可以睇番之前介紹嘅OTT平台比較,有免費有收費,總有一個啱大家嘅。

↓撳個廣告可以支持大兄台繼續寫作↓

↓撳個廣告可以支持大兄台繼續寫作↓