今日想分享一下點樣可以升級Laptop手提電腦嘅M2 PCI-E SSD，如果你對電腦硬件唔熟悉，可以考慮放棄，因為你有可能會整壞咗部電腦，而保養期內應該都唔會包嘅。當然，你都可以首先上網查下用緊嘅電腦官網嘅規格，睇吓究竟你部電腦用唔用到M2 SSD，又或者你已經用緊M2 SSD，而你想換一張更快更大容量或者更高規格，咁你就可以繼續睇落去喇。
此文針對有基本電腦硬件知識讀者，如果有任何問題請盡早放棄
你可以嘗試親自為用緊嘅Laptop或者將會買嘅Laoptop升級更大容量/更快速度嘅M.2 NVME PCI-E SSD
!記得要先備份你嘅檔案同資料，同埋準備Windows嘅安裝USB!
!要識得用bios選擇開機裝置!
重要：了解現有手提電腦嘅規格
Raven而家用緊嘅係Dell XPS15 9550，不過產品已經畀新版嘅XPS 15 7590取代咗，所以圖入面會用番新嘅7590做例子。可以見到電腦本身出廠已經用緊M2 PCI-E NVME SSD，咁由於呢類嘅SSD其實都有好多唔同規格嘅，咁建議大家搵清楚用緊嘅電腦支援幾長同容量幾大嘅PCI-E SSD。以XPS 7590為例，佢係支援M.2 2230/2280規格，PCI-E 3.0×4 NVME，最大2TB嘅硬件。咁你就可以開始上網留意有邊啲選擇喇！你可以透過m2 2280 ssd 或者 m2 nvme 2280 ssd 呢啲字眼嚟搜尋升級嘅硬件。
今次嘅升級主角：Samsung 970 EVO
由於XPS 15 9550原廠用嘅係PM951 SSD，同樣係由Samsung生產，不過唔同嘅係PM951或者PM字頭嘅SSD，都係主要用喺廠機，唔會喺普遍消費市場買到，所以規格同性能上都會差少少，而實際效能差別大家可以上網比較一下，呢度就唔PO圖喇。如果你用緊嘅Laptop容量唔夠大，都可以用同樣方法升級嘅。
↓撳個廣告可以支持大兄台繼續寫作↓
打開Laptop更換硬件
首先提醒大家可以先上網睇片學習點樣打開自己部Laptop，例如上Youtube搜尋 “Laptop型號 + teardown/upgrade/repair”等，始終每部電腦嘅硬件部局都有唔同，以下會以Dell XPS15 9550做例子，如果你都用緊XPS系列可以參考一下。
首先確認Laptop已經熄機，拔走充電線同其他USB裝置。之後利用適當嘅螺絲批扭開所有Laptop底嘅螺絲，大家可以參考網上影片教學。
順利打開Laptop底盤之後，會見到所有硬件分佈，唔同型號嘅電腦都會有唔同安排，可能你需要再扭開多一層保護罩都唔定。之後，要分辦一下電腦嗁排線同SSD嘅位置，以圖中嘅XPS15 9550為例，正下方係電池，佢嘅右手有一排線接駁電腦，呢度需要小心拔除，以確保陣間更換SSD時唔會有漏電或者其他問題。
將以上嘅排線拔除之後，就可以開始下一步喇。
↓撳個廣告可以支持大兄台繼續寫作↓
大多數嘅M.2 NVME PCI-E SSD都會好似上圖咁固定喺電腦底版上，一邊有螺絲鎖起，一邊係底版接觸位。之後要做嘅就係扭開螺絲，咁條SSD左邊就會彈起，大家小心慢慢抽出就成功移除舊SSD喇。
咁之後將新嘅SSD小心推入排線位，細力按低再上番螺絲就會完成更換。由於SSD右邊接觸位，係有防呆裝置，一長一短，大家要小心放岩位置。完成後，大家可以插番電池排線，將Laptop底盤重新上螺絲就可以重裝個Windows喇。
大家更換咗新SSD之後需要重新安裝Windows。
下載Windows USB Tool：連結
↓撳個廣告可以支持大兄台繼續寫作↓
祝大家順利完成，如果唔明任何一個步驟可以放棄。
