講起食泰國菜，除咗炒PhadThai、冬陰功、蝦刺生之外，船麵都係一款幾傳統嘅泰國食物，而暫時香港專食船麵嘅黃店，除咗之前介紹過嘅「船皇」，今次食嘅另一間黃店：「阿叔泰麵」喺大圍同元朗國都有分店，食物味道都好好，好值得大家去試！呢度嘅船麵湯底全部用牛骨熬製，而呢度有一碗特色船麵：粉紅船麵，湯底用上紅腐乳豬骨湯，相信味道會好特別！食完船麵，飲杯泰國特飲，之後記得食多個芒果糯米飯先走呀！
另一間船麵店-船皇(尖沙咀、銅鑼灣都有分店)：銅鑼灣黃店：香港都食到好味船麵-船皇
阿叔泰麵：船麵湯底夠香濃
今次同女朋友一人一碗船麵，一碗係牛肉，另一碗係豬肉。可以睇到兩碗都有通菜、芽菜、炸豬皮、花生碎。牛肉船麵就會跟番牛肉丸同牛腩，啲牛腩炆到好軟熟，完全唔會乾同硬，而且入晒味超正！豬肉船麵就跟番豬肉丸同豬肉片，豬肉片味道唔算突出，但豬肉丸就真係唔錯！好似要去到食泰國嘢先有好味豬肉丸咁…
點食船麵先至最好味？
小店枱面都貼咗一張教學，教大家點食船麵先最好味！首先每張枱都有齊晒4款調味料：魚露、白糖、白醋、辣椒粉，大家可以跟據番自己嘅喜好，每樣都加入去個船麵湯底！四大調味，缺一不可！
將啲調味放晒入去，大概就係圖上面咁嘅樣喇！
阿叔泰麵：特飲都唔錯
左邊啡色嘅係泰式檸檬茶，入面泰式嘅茶底有種特別嘅香料味，飲慣港式檸檬茶嘅朋友就可能會有少少唔慣。右邊黃色嘅係香茅菠蘿特飲，味道幾香，香茅味都幾突出。
飯後梗係要食埋：芒果糯米飯
如果食一碗船麵唔夠飽，除咗食多碗之外，其實可以叫番個甜品：芒果糯米飯。呢度嘅芒果糯米飯，糯米飯已經加熱咗，味道係好香濃嘅椰汁味，仲有少少香葉味。芒果就係雪凍咗，上面淋咗椰漿/椰奶嚟調味。總係覺得食埋芒果糯米飯，成餐飯先夠完滿。
阿叔泰麵：餐牌
除咗船麵之外，呢度仲有豬手飯、豬頸肉飯，同其他泰國菜嘅菜式，如果想試其他食物都可以㗎！
