人哋話食正餐有一個胃，食甜品係有另一個胃，今次同大家介紹嘅係屯門虹橋嘅有料案內所，利申未食嘢嚟食甜品都好飽…呢度有好味嘅梳乎厘班戟、窩夫，全部即叫即做，口感上真係唔錯。平日夜晚排晒長龍，但係都估唔到日頭去都唔少人，究竟香港人有幾鍾意食甜品orz
有料案內所 推介一：梳乎厘班戟
呢度主要有6款梳乎厘班戟：炙燒焦糖布甸梳乎厘班戟、Oreo朱古力流心梳乎厘班戟、伯爵茶梳乎厘班戟、小丸子紅豆抹茶梳乎厘班戟套餐、意式Tiramisu梳乎厘班戟、鮮果梳乎厘班戟。而今次Raven點咗嘅就係「炙燒焦糖布甸梳乎厘班戟」，蛋味勁濃郁，口感軟熟，送到嚟嘅時候仲係有微暖嘅溫度，配埋雪糕食幾好。
有料案內所 推介二：有料窩夫
除咗叫咗梳乎厘班戟，我哋仲叫咗一份小丸子紅豆抹茶麻薯窩夫，窩夫都係即叫即做，窩夫個心係麻薯做，所以口感煙韌幾得意，配埋抹茶味嘅cream同雪糕，甜甜哋嘅紅豆，味道口感都唔錯。
有料案內所 其他選擇
另外呢度仲有好多唔同嘢食，有冬天必食嘅雪山(沙冰)，亦都有唔同嘅日式小食。
佢哋而家除咗屯門分店之外，仲開咗將軍澳分店，大家可以留意佢哋嘅Facebook 同 Instagram 有咩update。
虹橋仲有好多好嘢食：威威美食(漢堡包) The City Corner
