我同女朋友去咗睇港產Bollywood電影《我的印度男友》

我同女朋友去咗睇港產Bollywood電影《我的印度男友》
我同女朋友去咗睇港產Bollywood電影《我的印度男友》

唔知戲院開番之後,你哋入場睇左邊啲戲呢?繼之前睇番港產片《一秒拳王》之後,最近同女朋友就去咗高先電影院睇咗另一套港產片,仲要係香港第一部由印度籍港人執導同編劇Sri Kishore嘅Bollywood電影《我的印度男友》。好高興香港都可以嘗試到拍出呢個風格嘅電影,亦係以前冇人做過,對電影製作班底都係一個好大嘅挑戰,雖然電影整體觀後感唔算話好好,但係好值得大家入場支持。

↓撳個廣告可以支持大兄台繼續寫作↓

電影主題曲:《印度咖喱因乜呢》

我的印度男友-主題曲

我的印度男友-故事簡介(零劇透)

劇情講述自細喺印度大嘅男主角,自細同屋企人喺印度大,爸爸就自己嚟咗香港工作,到男主角大個咗嘅時候先有能力帶屋企人嚟香港,但係無論印度籍或者南亞籍嘅新移民喺香港工作都有一定難度,男主角都唔例外。佢嚟到香港都面對好多對佢身份嘅歧視,令佢好挫敗唔敢再去嘗試融入香港,平時都係游手好閒,仲想自己番去印度生活。但係由佢遇到女主角嘅嗰一刻對佢一見鍾情。故事就係講男主角點樣追一個香港長大嘅女主角,中間都係講有咩挫折失敗,最後兩個人點樣喺埋一齊咁。

電影感想-Natalie篇

因為電影以香港Bollywood作為賣點,我入戲院睇之前都好期待有唱歌跳舞嘅元素,亦都好想睇到佢portray喺居住香港嘅印度人嘅生活,甚至會諗「香港電影 x Bollywood」嘅crossover會有咩化學作用。不過帶住咁嘅期待係會失望嘅… 反而如果我一開始唔expect呢啲位,視佢為普通喜劇,或者會好啲。

全套戲入面有嗰種bollywood味道既位就只有最開頭成班人無啦啦一齊喺中環跳舞,同埋最尾credit位。當然我都知道拍好多人嘅scene,喺疫情環境下都冇咩可能,所以雖然失望,但可接受會理解嘅。戲入面嘅男主角Krishna一家確實某程度show到居港印度人嘅生活,但係好直接好淺白。佢喺香港社會碰到嘅問題只有輕輕展現,例如佢俾人話外賣仔廢柴呢啲位。講真,應該唔係只係居港印度人遇過嘅情況,咁就突顯唔到居港印度人嘅生活問題。又例如Krishna嘅屋企人,都以唔同方法適應香港生活。爸爸QBOBO好想配合香港人,媽媽會認為生活到就ok,而妹妹新德里里就主動融入。點解Krishna反而咁left out呢,除咗佢『廢』之外,我認為唔夠多background解釋。

反而我好enjoy睇嘅一個位,就係Krishna無端端對女主角Jasmine嘅迷戀,或者都show到印度男人嘅價值觀。由本來毫無衝勁嘅男仔,因為對一個冇咩認識嘅街坊一見鍾情,幼稚地追佢,世界忽然充滿希望… 果種突然中邪咁嘅迷戀我覺得幾好笑,亦都有我以前睇過嘅Bollywood電影個種印度男仔愛情大過天嘅影子。不過女主角由本來覺得Krishna係痴漢,到突然表白話鍾意佢,就無咩elaboration,身為香港女仔嘅我反而唔係好理解呢個港女嘅心路歷程…

我諗呢套戲敗筆嘅位,如果普通觀眾知道導演嘅故事,以及拍攝當時嘅background,都會理解體諒嘅。導演其實無相關經驗,只係想寫下自己嘅故事。加上疫情關係,可能好多想拍嘅scene都拍唔到。因此睇得出無論係故事情節,剪接,配樂等都唔太合格。如果你係一個大量嘅觀眾,相信你都會接受嘅。我自己就ok嘅,淨係麻麻地喺印度拍嘅scene。

演員黎講,男女主角都不過不失啦,冇咩值得讚彈。張建聲做返佢成日做嘅角色,不過都係因為女主角家庭背景唔夠elaboration,你會唔知道Jasmine一家人點解會咁討好佢。kaki嘅演技係合格嘅,一貫佢做啲喜劇嘅水準(btw唔知大家有冇好似我咁,都幾想知Krishna會同Kong係best frd)。我諗我最鍾意嘅應該係做Jasmine媽咪嘅楊卓娜,可能私心覺得佢最靚,當然佢有啲內心戲(其實整套戲好少內心戲lol)係做得ok嘅。

整體黎講,呢套戲我會俾50分。有好多位都係因為體諒而接受,但係同時我都會諗,如果無疫情呢個因素,究竟套戲又會好幾多呢?

電影感想-Raven篇

電影入面經常都用一啲比較輕鬆同搞笑嘅手法去分享新移民嚟到香港遇到嘅唔同生活問題,無論係生活上或者工作上都有,呢方面我覺得做得OK嘅。

但係劇情方面有時會比較簡單化,有時有啲文化上嘅嘢,對印度文化唔熟悉嘅人又可能會唔明。

而電影嘅配樂方面, 所揀嘅歌曲有啲都算強差人意, 不過入面做得最好就係電影主題曲, 又有Bollywood風格, 旨程亦都唱得出嗰種風格。但係以Bollywood嘅電影嚟講,套戲真係得一首主題曲貼合主題,而電影亦只得一場Bollywood式歌舞,呢樣係幾失望嘅。

雖然套戲有唔少可以改善嘅地方,但係睇番電影嘅拍攝過程, 電影係喺2020年疫情比較緊張嘅時候拍攝, 期間部份劇情更加需要香港印度兩邊飛咁拍攝, 香港亦都因為限聚令原因唔可以咁易拍攝到, 可能因為呢個原因, 部份劇情或者內容都需要作出修改。呢度我會覺得以第一部香港製作嘅Bollywood電影,我諗我會畀70分,畀咁高分最主要係希望以後有人可以有更多嘅嘗試,再拍多啲更好嘅本地Bollywood作品。

我的印度男友-預告片

我的印度男友-預告片
↓撳個廣告可以支持大兄台繼續寫作↓