今次同女朋友去咗觀塘一間環境唔錯，食物質素幾高嘅日本菜食晚餐：The Artlab by Favilla。呢度嘅裝修主要都係比較日系，用上好多木枱木櫈，所有嘢都好簡潔。而食物方面都幾多唔同類型嘅選擇，今次因為係食晚餐，就冇試到佢哋嘅All Day Breakfast，而係叫咗一份「百里香春雞」同「慢煮封門牛柳定食」，兩樣食物嘅味道都畀到驚喜，冇諗到由擺盤、到食物味道，都做得好好。如果要去觀塘食飯，推介大家要嚟試下！
目錄
觀塘其他黃店：觀塘黃店：The Hunt ＆ Coffee Roastery-高質有驚喜西餐 意粉同甜品都好味
The Artlab by Favilla-慢煮封門牛柳定食
呢份慢煮封門牛柳份量比想像多，牛肉數量夠多，牛味都好夠濃，口感都好腍，配埋個燒肉汁入口就再香啲。而個沙律同薯蓉都有水準，個白飯上亦有加咗飯素，成個體驗都幾好！
The Artlab by Favilla-百里香春雞配大啡菇
而呢份百里香春雞都足足有半邊雞，而且雞肉唔會好柴好乾，味道好香好入味。另外沙律配嘅汁同上面份牛柳唔同，相信係配合番兩款食物嘅味道嚟調整過。而個大啡菇都好香芝士味，不過可以再大隻啲。而焗薯係經過簡單調味，味道比較淡，可以中和番濃味嘅雞肉。
The Artlab by Favilla-富士蘋果生芝士蛋糕
蛋糕味道比較淡，喺食完兩樣算係濃味嘅主菜之後，唔係好食到佢嘅芝士味，反而蘋果粒係真係幾好，不過份量算係細。不過只係加$22就可以食到，仲要係日本直送，我覺得算係唔錯喇。
飲品選擇多
女朋友就叫咗抹茶Latte，如果鍾意抹茶嘅朋友一定要試，因為真係好濃抹茶味。而我就叫咗一杯黑朱古力，因為佢用咗勁高%嘅可可，味道濃到有啲苦，唔錯！
The Artlab by Favilla-其他相片
佢哋除咗經營餐廳，呢度其實都有搞好多唔同Workshop，想知有咩玩可以上佢哋官網->呢條Link！
The Artlab by Favilla-餐牌
