沙田經瑞廣場雖然距離新城市真係有段距離，但係如果你想食好味嘅漢堡包，又想支持下黃店就一定要嚟試下SUPINE！佢哋主要都係賣意粉、意大利飯同埋漢堡包，而當中最吸引嘅當然係幾款出面應該食唔到嘅特色漢堡，漢堡包好厚好大份，主菜同啲配料都超足料，味道都唔錯，最重要係幾十蚊已經跟埋薯條同飲品，價錢真係算抵食！與其去啲外國連鎖店排咁長隊等食，不如去幫襯多啲黃店啦！
京瑞廣場其他黃店：沙田黃店：蒸廬-好味點心唔一定要去茶樓食
搵黃店記得上 LemonMap.io 檸檬地圖
正呀喂！SUPINE 日本咖哩滑蛋吉列豬扒漢堡
SUPINE嘅漢堡包Menu真係唔簡單，淨係漢堡包都有6款，有素嘅、有雞嘅、有牛嘅、有豬嘅，仲有魚嘅，總有一款啱你口味啩！詳細Menu可以睇番最下面嘅Menu相。今次食嘅係日本咖哩滑蛋吉列豬扒漢堡！唔係飯呀，係漢堡！睇圖應該都睇得出好厚好大份啦，所以想拎上手咁咬都唔易，可以搵張紙巾包住食又得，拎起刀叉切開一嚿嚿咁食都得，想點食就點食唔洗理人哋點睇嘅。味道方面，因為有滑蛋同咖哩豬扒，味道其實真係好香好好味，加埋其他配菜，好Fresh好正。跟餐可以揀要薯條或者湯，我就當然揀薯條啦！又粗又脆，比起出面好多薯條都好食！
SUPINE 珍珠帶子法式芥末忌廉汁意大利飯 都唔錯
呢個珍珠帶子法式芥末忌廉汁意大利飯唔算好傳統正宗嘅意大利飯，不過整體味道都OK嘅，個法式芥末唔算話好酸或者攻鼻，所以都可以接受。 如果想睇埋其他意大利飯/粉嘅菜式可以睇最下面嘅Menu，值得一提係個餐係跟薯條同湯嘅都係。
跟餐係跟啲薯條係咁大條㗎
單獨開新一段寫啲薯條你覺得我好跨張咩？真係好食所以先特登分享你知，食落啖啖薯仔，而且炸出嚟熱辣辣，外皮仲係脆嘅，如果主菜唔突出，呢兜薯仔分分鐘係妹仔大過主人婆呀！
SUPINE咖啡有進步空間
除咗檸茶檸水或者一啲特飲之外，SUPINE都有咖啡可以飲，不過質素普通，有進步空間。如果想飲咖啡，可以食飽之後去番隔離另一間黃店Whitewood Coffee買杯外賣咖啡，味道唔錯㗎！
SUPINE Menu
SUPINE 地址
今次嘅分享用咗新嘅格式，希望大家可以容易啲睇番唔同嘅食物分享，希望大家多啲支持良心小店。
5201314
