相信觀塘都算係全香港番工最慘嘅地區，好彩想洗錢食飯都可以揀去黃店消費。今次介紹嘅係位於東廣場地下嘅黃店幸福駅 (讀音：驛)，主要賣日式飯糰，官網話款式有20款咁多！除咗一啲粉紅色招牌嘅日式飯糰店都有賣嘅款式之外，幸福駅仲有一啲係用新豬肉OmniPork做嘅飯糰，素食朋友可以去試下！晏晝食飯糰可能有朋友會覺得唔夠飽，小店亦都有賣日式便當，不過Raven認為食兩三個飯團其實都OK！仲可以試多幾個味喎！
幸福駅：1個唔夠食夠2個囉
今次其實係喺隔離另一間黃店明記黑山羊買咗個外賣，又怕唔夠飽，所以就過嚟買多咗一個新豬肉飯糰。飯糰嘅包裝都係用3拆式嘅拆法，都好易上手。味道方面，紫菜仲係脆口嘅，新豬肉味道唔係好濃，質感同普通肉碎唔大分別，想試新豬肉嘅不妨買呢一款！
