之前一直都好想去試吓由鄧小巧家姐開嘅呢間家姐廚房，所以一有機會過海揾做啲嘢都特登book定枱先。喺附近行完街慢慢行去餐廳，可能餐廳位置唔算好就腳，坐低發現好似人流比想像中少…不過呢度嘅食物質素都唔錯，食物賣相靚，味道都OK，但有啲地方係可以改善少少 (｡ŏ_ŏ)
Follow佢哋 Facebook / Instagram 可以睇有咩新菜式
家姐廚房好唔好食？
龍蝦湯配法包 $108
因為呢度晚餐冇套餐，全部食物都係單點，如果想飲湯就要單叫一份龍蝦湯配法包。個龍蝦湯上得好快，味道算係普通，但係略嫌湯嘅溫度太低，屬於只係啱啱夠暖，如果熱啲會更好。而法包口感唔錯幾煙韌，外皮都夠脆。
慢燉牛面頰肉手工意粉 $198
大家有機會嚟嘅話，推薦試吓呢份慢燉牛面頰肉手工意粉，牛肉煮到相當軟熟，完全唔韌唔柴。而手工意粉更加係一大亮點，闊身勁鎖汁，每條意粉都索晒啲味，煮嘅時間啱啱好，口感偏爽，唔會軟淋淋。
香煎鮮菇日本帆立貝 $188
呢份係餐廳其中一個推介嘅Main Course，不過比起上面嘅手工意粉，無論味道定賣相都差少少。菜式嘅調味應該係偏向簡單，帆立貝係帆立貝味，菇係菇味咁。
Tiramisu $88
嚟到講甜品嘅部份想提一提，當日本身想食嘅其實係蘋果批 (上面睇人哋影相好似好靚…)，而唔係Tiramisu…因為餐牌上冇mark低停售，店員喺我哋落單嘅時候先講原來冇得order，之後佢就話餐廳而家有另一款cheese cake可以揀，但係問佢係邊一類cheese cake佢又答唔到，如果佢哋呢方面做好少少就好喇…鍾意食甜品嘅Raven，最後求其叫埋呢件Tiramisu，味道食得出佢用嘅酒係唔同平時食到嘅唔同，所以食落去第一個感覺好特別，不過大份少少就好喇…
傳統法式麵包焦糖多士 $108
上多士之前因為飲湯嘅時候已經試過法包，所以都期望呢份甜品好食。上菜嗰時就覺得賣相唔錯，而且好似款式係會不定時更換，因為同網上睇到用嘅水果唔同。味道亦都真係幾好，件法包口感仍然係外皮脆身，但係入面嘅麵包就已經有焦糖化，同口感變得比較軟，食落好香甜。而包上面嘅車厘子嘅酸味就將焦糖嘅甜味中和返，味道仲豐富咗！
家姐廚房有咩飲？
就咁睇餐牌都會覺得餐廳嘢飲應該唔算好叻，選擇比較簡單，可能配返西式嘅菜式餐點會好啲？最後只係揀定叫咗一杯凍Latte同橙汁，都係冇咩特別嘅。
家姐廚房 餐牌
呢度嘅食物綜合味道、賣相、份量，Raven認為係屬於偏貴，不過希望餐廳之後可以有唔同嘅改善，咁可能會吸引到食客再返去試試！
如果鍾意食意粉，Raven都推介大家可以試吓尖沙咀嘅梔子、旺角嘅Black Coffee、好多分店嘅牧羊少年咖啡館
家姐廚房 餐廳地址
