利申我本身唔係特別鍾意食拉麵，但係如果講香港最好味嘅拉麵店，我會推介銅鑼灣嘅 Ramen Nagi 凪拉麵，舖位喺銅鑼灣渣甸坊啲排檔附近，比起以前大坑舊鋪細少少，但係拉麵味道仍然咁好食！雖然部分店員冇再喺度做，但係每次去都會遇到香港最有禮貌最友善嘅店員！如果鍾意食拉麵一定要嚟試下!
17/1/23 更新：佢哋每日賣晒拉麵都會喺FB/IG出Story提醒顧客，唔想摸門釘記得Follow 佢哋嘅 Facebook 同 Instagram喇！
2023年1月限定拉麵：蕃茄櫻花蝦拉麵
今次限定拉麵個蕃茄湯幾濃厚，帶少少蝦味之餘，拉麵上面仲有京蔥同牛小排，牛肉烤得超香超濃超軟熟，疊住牛肉嘅特粗拉麵仲會吸埋啲牛肉味超正！提提大家所有限定拉麵都冇得自訂湯嘅鹹度、濃厚度、拉麵硬度等，全部都會由廚師決定。
經典口味：豚骨拉麵
鋪頭有4款固定拉麵+1款限定拉麵，上面呢碗「豚骨」拉麵係叫咗3辣勁多蒜濃厚湯底配普通硬度拉麵加叉燒，店員每次送拉麵嚟都會好有禮貌同詳細介紹建議食法，以呢碗為例就會建議先飲一啖湯試下湯底原本嘅味道，之後再解釋個辣醬喺碗底左下角，可以攪勻再襯熱食。湯底夠香濃，配埋個炎之醬味道更加突出，叉燒大塊又夠腍。
經典口味：黑骨拉麵
經典口味：赤骨拉麵
赤骨湯底係大蒜加辣油加唐辛子煲，辣味都好香好正！
必試小食
凪豚餃係Raven喺香港食過嘅日式煎餃入面最好味，個皮唔會煎得好硬好乾身，而個豚肉餡份量超足，而且好juicy，餃子上面有特製蘿蔔蓉好香好正！
溏心蛋超正，個蛋黃好creamy！
Ramen Nagi 凪拉麵：點餐紙
固定拉麵可以自己揀 1.湯底咸度 2.湯底濃厚度 3.湯底蒜泥數量 4.配料(叉燒／野菜) 5.炎之醬(辣度) 6.拉麵軟硬度。而限定拉麵就唔可以自己揀湯底選項嘅。
Ramen Nagi 過往限定拉麵：赤蝦拉麵
今次重新開番之後，第一碗限定拉麵係赤蝦拉麵，湯底用店舖做嘅豬骨湯同赤蝦汁煮成，味道勁香仲有好濃嘅蝦味，完全唔會覺得太鹹或者油膩。拉麵上面嘅蝦都好彈牙，算係新鮮，味道都香。最後食完拉麵連湯底都全碗飲晒，正！
Ramen Nagi 凪拉麵：其他相片
每張枱都有芝麻同辣粉，有需要可以自己加落拉麵度。
Ramen Nagi 凪拉麵 地址
詳細地址: 銅鑼灣渣甸坊48號采怡閣地下5號舖，下面係渣甸坊48號位置
