長洲第二間同大家分享嘅黃店係陳通記，位置喺長洲碼頭附近嘅熟食中心，千祈唔好打算行入街市呀，並唔喺街市入面㗎！陳通記就喺個熟食中心比較中間嘅位置，所以大家無論邊度行入去都要望清楚，仲有記得唔好行到隨便坐低，好有機會坐錯隔離鋪頭嘅位，最好搵店員畀個位你就最好！坐低記得叫碗沙爹鮮牛麵，兩餸三餸就悉隨尊便喇，聽講雞翼都係幾好味！呢度嘅沙爹湯好濃，聞落已經好香，食落仲會有啲花生碎，口感味道都一流！
長洲其他黃店推介：
長洲黃店：慢活瞬間長洲粒粒雪糕 – 食物全部即叫即煮仲有粒粒雪糕食
陳通記：沙爹牛肉米通超正
今次叫咗呢碗沙爹鮮牛肉米通，鮮牛幾滑幾嫩，而且數量都唔少。但係最吸引都係個沙爹湯，大家記得要喺個底度攪勻嚟食，啲花生甜味就會滲晒去全碗湯，食米通有個好處係入面都會滲到湯汁。
另一款最鍾意食嘅就係蛋牛治烘底，而呢度有得揀番咸牛肉或者鮮牛，如果想有口感啲建議試下鮮牛，不過今次我哋叫嘅就係咸牛肉嚟。個蛋煎到包住晒咸牛肉，個蛋亦都煎到冇咗腥味，個口感都唔錯！
天氣咁熱，最後梗係要飲埋凍奶茶同凍檸茶先得！
大家如果要搵陳通記，認住呢個黃色招牌大大隻字寫住通記就啱㗎喇！記得拎位要問店員，唔好亂坐去隔離檔嘅位呀！
餐牌有少少朦，但係應該都睇到有咩料可以揀。如果唔食牛肉嘅朋友都可以加$5要沙爹，所以一定要試呀！
